Бэҕэһээ, ыам ыйын 6 күнүгэр, Өксөкүлээх Өлөксөй аатынан Норуоттар доҕордоһууларын дьиэтигэр норуот кутун туппут,  «Мозаика» норуодунай спортивнай бальнай үҥкүү сааскы бырааһынньыктааҕы кэнсиэрэ олус үрдүк таһымҥа ааста. Бу спортивнай, бальнай хайысхалаах үҥкүү коллективын СР культуратын үтүөлээх үлэһитэ Михаил Захарович Сивцев төрүттээбитэ. Ол кэмтэн ыла, элбэх кэнсиэр туруорулунна, араас фестиваллар ыытылыннылар, араас таһымнаах күрэхтэһиилэр аастылар. Бу ыытыллыбыт дьаһалларга “Мозаика” спортивнай-бальнай үҥкүү толорооччулара сайдан, кэҥээн иһэллэр. “Мозаика” коллектив иһинэн Лейла, Юрий Алексеевтар арыйбыт “SUNRISE” спортивнай-бальнай үҥкүү коллектива үөскээн, үҥкүү кэрэ абылаҥар ылларбыт кэнчээри ыччаттар дьарыктаналлар.

Дьоро киэһэ программата киэҥ, кыттааччыта элбэҕэ сөхтөрөр. Кэнсиэр икки блоктан турар, ырыалара да үҥкүүлэрэ да классика хайысхалаах ыытыллан, дууһа кылын таарыйан олус ис-киирбэх буолла.

Аҕыйах күнүнэн кэлээри турар Кыайыы күнүн көрсө, сэрии ыар сылларыгар кыайыыны уһансыбыт хорсун саллааттар сырдык кэриэстэригэр “Синий платочек” ырыанан саҕаланна.  Л.уонна Д.Колтовскойдар толорууларыгар “День Победы”, Б.Иванов толоруутугар “Есть только миг” ырыалар толорулуннулар. Уон сыллааҕыта Михаил Захарович бэйэтин коллегаларын кытта “Кыайыы Вальсын”(“Вальс Победы”) бырайыагын олоххо киллэрбиттэрэ. Онон, бырайыак дьон өйүгэр-санаатыгар иҥэн, улахан суолталаммытын туһунан кэпсээһин буолла. Вальс Победы бырайыакка куруук кыттан, элбэхтэ чемпион аатын ылбыт пааралары ахтан аастылар. Ол курдук, сэрии бэтэрээнэ, Роман Романович Охлопков сырдык аатын ааттаан, кини партнершатыгар А.К.Татариноваҕа көрөөччүлэр истиҥ махталларын туоһутун-дохсун ытыс тыаһынан сибэкки дьөрбөтүн туттардылар.

Кэнсиэр иккис блога “Мозаика” видеоклибыттан саҕаланна. Уонна баай репертуарыттан “Венский вальс”, “Медленный вальс”, “Микс Стандарт”, “Танго”, “Пасодобль”, “Румба”, “Джаз”, “ча-ча-ча”, Борисовтар, Тимофеевтар толорууларыгар “Венский вальс” ураты нарын хамсаныыларынан көрөөччүнү абылаатылар. Киһи сөҕөрө баар, хас биирдии нүөмэр таҥаһа-саба үҥкүүгэ сөп түбэһэрэ, пааралар үҥкүү хамсаныыларынан ураты нарын эйгэни үөскэтэллэрэ буолар.

“SUNRISE” үҥкүү коллективын үҥкүүһүттэрэ  “Венский вальс”, “Квикстеп”, “Полька”, “Модный рок”, “Ча-ча-ча” эмиэ ытыс дохсун тыаһынан толордулар. Оҕолор барахсаттар кэрэ эйгэтин ситимигэр киирэн, үҥкүү искусствотын баһылыыр баҕалара, кыахтара баарын итэҕэттилэр. Кинилэр толорууларын көрө олорон, үҥкүүгэ уһуйааччыларын Лейла Юнисовна, Юрий Захарович Алексеевтар профессиональнай үлэлэрин, таһымнарын бэлиэтии көрөҕүн. Эдэр, кэскиллээх хореографтар үҥкүүлэрин туруоруулара сонунтан сонун.

Үҥкүүлэр быыстарыгар Д.Шахурдина толоруутугар “Времена года» «Гроза”, “Libertango”,  М.Попова “Ave Maria”, Кармен операттан “Марш Тореодора”, Л.Колтовская  Патрисия Каас репертуарыттан “Mon mec a moi”, Джо Дассен репертуарыттан “Et si tu n”еxistais pas”, Т.Захарова, Л.Колтовская толорууларыгар Деми Руссос репертуарыттан “From souvenirs to souvenirs” ырыалара көрөөччүлэри сөхтөрдүлэр.

Байаан тиһилэктэринэн ханнык баҕарар ырыа матыыптарын таһаарар талааннаах байаныыс Виктор Дабайаан “Despasito”, “Ламбада” ырыалары тыаһатан, көрөөччүлэрдиин биир ситимҥэ киирдэ. Бөлөҕүнэн толорууга “Леди” ансаамбыл ырыаһыттара “Нанэ цоха” цыган норуотун ырыатын, Бони М репертуарыттан “Rivers of Babylon” ырыалары толордулар. Кэнсиэр бүтэһигэр “Леди” ансаабыл “Дьокуускай куоратым” диэн ырыанан тапталлаах куораппыт өссө да үүнэ-сайда турарыгар баҕаран туран, иэйиилээхтик ыллаатылар. Дьоро киэһэни “Мозаика” ансаамбыл “Дьол амтана” үҥкүүнэн түмүктээтэ.

Бу киэһэ биир үтүө үгэскэ кубулуйбут “Балыктаах киэһэтэ” ырыаҕа үҥкүү-флешмоб умнуллубата. Михаил Захарович “SUNRISE” үҥкүүһүттэрин кытта сэргэхтик үҥкүүлээн, көрөөччүлэр дохсун ытыс тыастарын ыллылар.

Кэнсиэр бүтүүтэ, Лейла Юнисовнаны көрсөн, аҕыйах боппуруоска эппиэттииригэр көрдөстүбүт. Онуоха уһуйааччы маннык эппиэттээтэ: “SUNRISE” үҥкүү ансаамбыла “Мозаика” иһинэн үлэлиир ансаамбыл. Кэргэмминээн СР култууратын туйгуна Юрий Захаровичтыын иккиэн тэрийэн үлэлэтэбит. Мин идэбинэн быраас да буолларбын, кэрэ эйгэ ис дьиҥин кыра эрдэхпиттэн сөбүлүү улааппытым уонна үҥкүүһүт ЮрийЗахаровичтыын олохпун холбоон, үҥкүү искусствотыгар ылларан, билигин уһуйааччы быһыытынан үлэлии сылдьабын. Төрөппүттэрбит, уһуйуллааччыларбыт биир санаалаах буоланнар, коллектив тыына доҕордуу, истиҥ. Онтон үҥкүүлэри үөрэтии, үҥкүүнү туруоруу, эрчийии өртүгэр Юрий Захарович үлэлэһэр. Ол эрээри, иккиэн үлэбит биир. Сахабыт норуотун кэнчээри ыччатыгар үҥкүү эйгэтин билиһиннэрии, ылыннарыы, инникилэригэр кыһаллыы буолар. Бүгүҥҥү ыччат-норуоппут сарсыҥҥы эрэлэ. Онон, “SUNRISE” диэн, ааппыт да этэринии, тахсан эрэр күн курдук уһуйуллааччыларбыт олоххо эрэллээх, кыахтаах буоллунар. Инникитин былаан элбэх. Улахан да дьону мунньан, кэрэни кэрэхсиир үтүө дьарыгы олоххо киллэриини толкуйдуубут.  Түгэнинэн туһанан, үҥкүүгэ олоҕун анаабыт үтүөлээх киһибитигэр Михаил Захаровичка, төрөппүттэрбитигэр махталбытын тиэрдэбит»- диэн санаатын үллэһиннэ.

Читайте также:  «Небесные воительницы»

Кэнсиэр долгутуулаах түгэнинэн, үҥкүү корифейынан ааттаммыт үтүөлээх үлэһиккэ Михаил Сивцевка “Вальс Победы” кыттааччылара уонна “Мозаика” үҥкүү уһуйуллааччылара анал бэлиэни туттарыылара буолла. Бу бэлиэни “Вальс Победы” төрүттэммитэ уон сылыгар анаан оҥоттордулар.

Сарсын, Марфа, Сергей Расторгуевтар ааттарынан Государственнай Цииркэ иннигэр уон сыл устата ыытыллыбыт Вальс Победы үбүлүөйүнэй дьаһала куорат дьонун мунньуо. Өрөгөйдөөх Кыайыы үөрүүтүн вальс үҥкүү нөҥүө көрөөччүлэргэ өссө төгүл көрдөрүө, итэҕэтиэ.

Время танцевать!

Дьэ, бу курдук, “Мозаика” норуодунай үҥкүү ансаамбылын биир бэлиэ күнэ, көрөөччүлэргэ үтүөнү түстээн ааста. Маннык үтүө күннэр, дьоро киэһэлэр, норуот кутун туппут Михаил Сивцев салайааччылаах “Мозаика” ансаамбыл тэрийиитинэн элбэхтэ аастахтара. Инникитин да, буолуохтара турдаҕа. Ол кырдьык. Тоҕо диэтэххэ, үҥкүү курдук үтүө, сырдык санааны саҕар, үҥкүү курдук киһини кырдьыбат оҥорор,үҥкүү курдук киһи кутун-сүрүн бөҕөргөтөр өссө туох баара буолуой?

                              Айар Кут медиа бөлөх