Убаастабыллаах биир дойдулаахтарым!

Тохтор тойук туонатыгар, «Кыталыктаах» кырдалыгар, киэҥ Ньурбам киэлитигэр «Модун күүс, өркөн өй, ыра санаа ыһыаҕа» сомоҕоннон холбоһон, эйэнэн эҕэрдэлэһэн, чаҕыл күннээх күнүнэн, ааһар былыты аттанан, көтөр былыты көлөлөнөн, бэспит ыйа барахсан биэтэккэ тиийэн кэлэн, Иэйиэхсиппит эҥэрдэһэн, Айыыһыппыт аргыстаһан дойду-дойду аайыттан, ыраах-чугас сирдэртэн алгысчыттар, арчыһыттар айхаллаһан аастылар, ыра гыммыт ырыаларынан «Киэҥ Ньурбаннан» бүтүн улууһу холбообут Сергей Васильев-Бороҕоонускай кэнчээрилэрэ Василий Парников Аар-саарга аатырбыт «Кэнчээри» ырыа-үнкүү ансаамбыла, ытык ырыа ындыылаах ыллаан, көтүтэн аастылар. Оҕобут, уолбут Егор Валерьевич Иванов, Чаппандалар удьуор уус, кыахтаах-уохтаах, үлэннэн үлүһүйбүт Алексеевтар-Андака Дьөгүөр сиэнэ силиги ситэрэн, сиэдэрэй үҥкүүлээх Михаил Сивцев салайааччылаах «Мозаикалар» сир симэҕэ буолан, үрүмэччи үҥкүүтүн «Мозаика» үнкүү ансаамбылын сиэтэн кэлэн үҥкүүлэтэн, сир симэҕин киэргэттэ. Гошабыт кэпсээнтэн кэпсээн, аны үрдүк үрүмэ тыллары үрүлүччү үөрдуппүт, көмүс бөрүөлээхтэри илдьэ кэлэн дойдутун кэрэ бэлиэ күнүн, Саха саҥалаах эрэ бары ааҕарын курдук, күнүнэн күлүмнэтэн сотору сылдьар үтүө сонун суруттарда. Күндү көмүс күөмэйдээҕин, Ньурба күөрэгэйин Алевтина Лукинованы түмүк ыһыах киэргэлинэн күлүмнэттэ, ылбаҕай ырыа хотунун, Василий Парников киэҥ аартыкка кынаттаан көтүппүт Варя Аманатованы кылыһахтаах куолаһын кылыгыратта. Дьэ онтон оҕолоор, Руслан Габышевы кулгаах, харах сэгэтэн, тутан олорон оонньотон, чараас, чопчу тыастары кыл кырыымпатынан, кэрэ кыыстыы килбигийэ, саҥа тыллар сибэккилии сипсиһээхтээн аастыбыт. Руслан Габышевы туспа бэйэтин ойуулаан, худуоһунньугум буоллун, дьүһүйүөҕүм хааллаҕа, көмүс илии тарбаҕын хоһооннорбор холбооммун хоһуйуоҕум хааллаҕа. Мин Настаам, Анастасия Афанасьевна Кардашевская айылҕа оҕото. Мин Настаабынаан олох кэрэ эйгэтигэр эдэр эмньик сааспытыттан сиэтиспитинэн, биир уһуйааччыга Семен Степанович Егоровка — Оһоокой Сэмэҥҥэ аһара солуута суох күлэн дьарыллан, арыт бэркэ үһүөн чабырҕахтаан өрө көтөн хайҕанан, дьүөгэбинээн бииргэ үөрэх үрдүк эйгэтин эйэннэн сэриилээн, олох очурдарын-оҥхойдорун, сипсиһэмммит кыайаммыт арыт ат уорҕатыгар, арыт өрөҕөтүгэр,үөһээ -аллараа үктэннибит, хардыылаатыбыт. Мин Настаабар эрдэттэн үлэлэһэн, охтор-иҥнэр күннэрбитигэр ыраах да буолларбыт, чугас буолан ыксалаһан харахпытынан өйдөһөн — өйөһөн кэлбит дьоннор, бу сырыыга кини миэхэ чабырҕаҕы өрө көтүтэргэ, учууталларбыт Ксенофонт Дмитриевич Уткин, Сэмэн Дьөгүөрэп эккэ-хааҥҥа иҥэрбиттэрин санатыһан ааһаары, бииргэлэспиппит, онон Анастисия Афанасьевна Ньурбаҕа кэлэн барыыта бу эрэ буолуо суоҕа, хаһан Сэмэн убайбыт ууран-тутан хоһуйбут чабырҕаҕа эккэ-хааҥҥа иҥиэр диэри, дьүөгэм кэлэн дьүөрэлэһиэ, баар билиититтэн үллэстиэ диэн эрэнэбин. Ыһыах үрдүк таһымҥа барыыта киэн туттар үбүлүөйдээх суруксуппут, эссеист поэт, сценарист Галина Томская өҥөтө, тумус туттар оҕобут искусство үтүөлээх деятелэ Александр Титигиров уус киһим кичэйэн уһанарыныы, ууран-тутан чочуйан, өрүү бииргэлэһэр Галятынаан-Галина Степановалыын, үҥкүүһүт кыргыттарынаан, уолаттарынаан ыһыах тутулун өйдөнөрдүү дьон-сэргэ дьүүлүгэр кэккэлэтэн ууннулар. Хайдах махтаммат буолуохпунуй үлэһит үтүө доҕотторбор. Галям барахсан эдэр сааһым аргыһа, өтөрү-батары көрүүлээх, өргөстөөх санаата Ньурба ыһыаҕын ытыктыырга, сүгүрүйэргэ 90-с сыллартан Марта Романовна Гоголева салайан олорон биһигини имитэн инники күөҥҥэ таһаардахтара. Ытык убайбыт Ксенофонт Дмитриевич Уткин-Нүһүлгэн үтүө аатыгар Үс Төгүл сүһүөхтээх бэйэбит сүгүрүйэн, хоолдьуктаах бэйэбит Ньурбалар хоҥкуйарбыт наадалаах. Умнууга хаалбыт сиэрдэри, үһүйээннэри, кэпсээннэри холбукатыгар хомуйан, бэлэх уунан бэлэмнээн, үөрэнээччилэрэ Виктор, Борис Борисовтар хоойдоругар холбоон, бу уолаттар көмөлөрүнэн көрдөнөн, биһиги билигин тылбыт тыыннаах, куппут сылаас, санаабыт күүстээх. Силиһинэн ситимнэнэн, уһуйаанынан утумнанан Ксенофонт Дмитриевич иитиэхтээн ииппит кыргыттарыгар Марта Романовна Гоголеваҕа, Татьяна Прокопьевна Олесоваҕа, Лена Руслановна Степановаҕа махтанан туран, төрүт ааппытын өрө тутан үлэлэспиттэрин, үтүө энньэни хаалларбыттарын салгыы төргүүлэнэн илдьэ баран, тулалыыр уйгуга уунаммын, доҕотторбун сэтиилэнэн, сиэлэн-хааман сэгэлдьитэн саҥа киһини үүннэрэн, салгыы бара туралларыгар санааннан санааны дабайан, салгыппат уһуннук ый кыыма ыһыллар ыралаах олоҕу тутуһуом. Үлэлэспит салалтабар, дьоммор-сэргэбэр, оҕолорбор, тулалыыр эйгэбэр махтал, этэннэ буолуҥ.

Ньурба улууһугар Култуура Департаменын салайааччыта Р.М. Тихонова