Таатта ыччата,нуучча дуобатыгар маастарга кандидат Александр Неустроев сырдык кэриэһигэр

“Айар Кут” сурунаал Таатта эдэр ыччата,  эдэркээн оҕо, тапталлаах уол Александр Кириллович Неустроев олорон ааспыт олоҕун үйэтитэн, бүгүн, муус устар 9 күнүгэр, ахтан-санаан ааһар.

Александр Кириллович Неустроев 1987 сыллаахха, Уус-Тааттаҕа күн сирин көрбүтэ.

Ийэтэ Лариса Александровна бу курдук ахтар: ”Уолум барахсан кыра эрдэҕиттэн сытыы-хотуу, булугас-талыгас, олус сүрэхтээх этэ. Оҕом маҥнайгы учууталларынан Уус-Тааттаттан Н.Я.Постникова, И.Н. Гуляев аатынан Туора-Күөллээҕи орто оскуола учуутала Е.Е.Аянитова этилэрэ. Оскуолаҕа үөрэнэр сылларыгар үөрэҕэр куруук үчүгэй, сороҕор туйгун да буолара. Математиканы, географияны олус сөбүлүүрэ. Кэлин географияҕа чаҕылхайын көрдөрбүтэ. Ол талаана Чурапчыга, СР үөрэҕириитин туйгуна И.И. Дьячковскай үөрэтиитинэн тахсыбыта. Предметнэй олимпиадаларга кыттара, миэстэлэһэрэ.

Хайа күн оскуолаҕа барыаҕыттан, буукубаны үөрэтэн, ааҕар буолуоҕуттан биир да тэтэрээтин марайдаабакка, биир тэҥ аккуратнай буочарынан суруйан оскуолатын бүтэрбитэ. Адьас кыра эрдэҕиттэн биир да кинигэни марайдаабакка, алдьаппакка бу күн сиринээҕи олоҕун түмүктээбитэ буолуо.

Таатта ыччата,нуучча дуобатыгар маастарга кандидат Александр Неустроев сырдык кэриэһигэр

Оскуолаҕа сылдьан, научнай-практическай конференцияҕа “Булчуттарга аналлаах харыс тыллар” диэн тиэмэнэн улуус, республика призера, лауреата буолан,оҕом үөрбүт харахтара бу көстөллөр.

Кыра эрдэҕиттэн дуобаттыыр талааннаах буолан, бэһис кылаастан Д.П.Коркин аатынан спортивнай оскуола-интернакка үөрэнэн бүтэрбитэ. Маҥнайгы тренеринэн И.Ефремов буолбута. Онон, эрчийэр оҕолорун, ол иһигэр Сашаны, Чурапчыга, айылҕаттан анаммыт дуобат тренердэригэр, Кыычыкыннарга үөрэттэрэ киллэрбитэ. Сэттис кылааска үөрэнэ сылдьан, нуучча дуобатыгар маастарга кандидат буолбута. Республика иһигэр, Россия куораттарыгар араас күрэхтэһиилэргэ кыттыбыта. Дуобакка уһуйааччынан, сүбэһитинэн РФ, СР үтүөлээх тренерэ Н.Н.Кычкин – 1 этэ. Николай Николаевич куруук Сашаны хайгыыра, онно суруйар тэтэрээттэрин оҕолорго көрдөрөрө, Неустроев Саша буочарын, биир да, марайа суох суруйарын бэлиэтиирэ. Тренеринээн РФ, СР үтүөлээх тренерэ М.Н.Бырдыннырова салайыытынан элбэх күрэхтэргэ сылдьыбыта.

Оскуолатын этэҥҥэ бүтэрэн, бэйэтэ туруорсан туран, биир сыл Камчаткаҕа, муораҕа, Тихоокеанскай флотка сулууспалаабыта. Онно даҕаны, сахатын хаана киирэн, туһаҕынан куобах тутан салалтатын аһатарын кэпсиирэ.

Иллэҥ кэмигэр бултуурун, балыктыырын, хапкаан иитэн киистиирин сөбүлүүрэ. Убайын, аҕатын кытта туртастыыр буолара.

Читайте также:  Журналист, социолог, ученый-просветитель… К 100-летию Ф.С.Донского

Саша биир ураты хаачыстыбатынан олус кэһиимсэх уонна ийэтин, балтын олус таптыыра, харыһыйара, сыллыыра этэ. Арааһата, олоҕун устата сыллыахтааҕын барытын сыллаан барбыт курдуга. Кэһиилээх кэлэрин, эҕэрдэ суругар баҕарар санаатын лоп-бааччы суруйара. Балтыгар Женяҕа сурук суруйарыгар, үөрэҕэр кыһаллыахтааҕар, үтүө киһи буолуохтааҕар хайаан да суруйара. Балта куоракка киирэн университекка үөрэнэригэр, бастаан утаа, аллараа подьезка түһэн көрсөр буолара. Оннук адьас ураты харыстабыллаахтык балтыгар сыһыаннаһара.

Аһылык кэнниттэн остуолтан турарыгар хайаан да махтанара, баһыыбалыыра. “Мама, минньигэс аһын иһин махтанабын” –диирэ.

Таатта ыччата,нуучча дуобатыгар маастарга кандидат Александр Неустроев сырдык кэриэһигэр

Аармыйа кэнниттэн, Дьокуускайдааҕы баһаары утары управление байыаһынан үлэлии киирбитэ.

Кэргэн ылан, олоҕун салгыыр санаалана сылдьан, суорума суолламмыта. Ол эрээри, Саша олоҕун салгыыр оҕото-кыыһа Кира аҕата суох буолбутун кэннэ сыл аҥара буолан баран күн сирин көрбүтэ. Билигин Кира Неустроева дьыссаат иитиллээччитэ, олоҕор бастакы кинигэтин — буукубаары ааҕар, уруһуйдуурун сөбүлүүр кыысчаан буола улаатта.”

Киһи буолан бу Орто дойдуга төрөөн, эдэр сааһыгар олохтон туораабыт Саша Неустроев олорботох олоҕун оҕолоро олоруохтара. Төрөппүт ийэтэ, балта, аймахтара ыар сүтүгү кытаанахтык тулуйан, ылынан, атын олох күннээҕи түбүгэр киирэн, тапталлаах уолларын, убайдарын аатын ааттатан олороллор.