Саха эстрадатын сахалыы куттаах ырыаһыта, Саха Өрөспүүбүлүкэтин үтүөлээх артыыһа, “Айар Кут” сурунаал доҕоро Варя Аманатова- Алаас кыыһа кулун тутар 9 күнүгэр, киэһэ 16.00 уонна 19.00 чаастан, 25 сыллаах “Үс кутум” айар үлэтин дьоро киэһэтин ыытар.
Биһиги, “Айар Кут” сурунаал айар кэллэктиибэ Варялыын ыкса сибээстээхтик үлэлиибит. Ыытар дьаһалларбытыгар үтүө санаатынан, истиҥ сыһыанынан кэлэн үөрэ-көтө, сахатын дьонун ырыатынан эҕэрдэлиир.
Саха киэн туттар дьоно, үтүөлээх артыыстара Марфа уонна Сергей Расторгуевтар ааттарынан Бриллиантовай Цииркэ дьиэтигэр “Алаас тула” улахан кэскиллээх бырайыакпытын өйөөн, сахалыы иһирэх ырыаларын ыллаабыта. Саха дьоно бары даҕаны, алаастан төрүттээх буоламмыт, ис куппутугар кылыһах, тойук чугаһа чуолкай. Ол иһин, Варя ыллаабыт ырыалара хас биирдии киһини төрүттэрбит, өбүгэлэрбит олохторун сыаналыырга, кинилэр мындыр толкуйдарын, самныбат саргыларын билэргэ сирдиир.
Былырыын Ньурбаҕа ыытыллыбыт “Модун күүс, өркөн өй, ыра санаа” ыһыахха “Айар Кут” кэллэктиибэ кыттан үйэтитии үлэтигэр кыттыбыта. Дэлэгээссийэ састаабыгар киирсэн, улуус дьоно ыыппыт улахан тэрээһинигэр Варя Аманатова кыттыбыта. Онон, Ньурба дьоно-сэргэтэ түгэх өбүгэлэриттэн бэриһиннэрбит кылыһахтаах куолаһын, дириҥ иэйиилээх ырыаларын истэр дьолломмуттара.
Кэнники сылларга үтүөлээх артыыстар Марфа уонна Сергей Расторгуевтар ааттарынан Бриллиантовай Цииркэ кэллэктиибэ, талааннаах артыыска Марфа Расторгуева сырдык аатыгар “Кылыһах куйаардыын ситимэ” куонкуруһу киэҥ далааһыннаахтык ыытар. Бу куонкурус дьүүллүүр сүбэтигэр биир дьоһун миэстэни Варя Аманатова ылар. Саха сиригэр сахалыы истиҥ ырыалары ыллыыр, куйаар дьикти ситимигэр киирэр кылыһахтаах ырыалары, тойуктары толорор дьону түмэр, үйэтитэр дьоннортон биирдэстэринэн, Варябыт буолара саарбаҕа суох.
Эппиппит курдук, кулун тутар 9 күнүгэр буолар “Үс кутум” айар кэнсиэр элбэх көрөөччүнү түмүөҕэ диэн эрэнэбит.
Кыттыыны ылыахтара- Анастасия Готовцева, Анатолий Бурнашев, “Айархаан” этно-бөлөх, Саарын, Чыскыырай, Константин Степанов, Зинаида Колодезникова, Петр Кулаковский, Фатина Иванова, Байтыкан Батаакап, Любовь Константинова-Кыталы Куо, Олимпия, Аркадий Самсонов.
Алгыс туомун оҥоруохтара — Афанасий Федоров, Толбон, Кулан.
Маны таһынан кыттыахтара, “Төрүт” дорҕоон бөлөхтөрө – “Кыл саха”, “Дорҕоон дойду”, саха сирин ырыа-үҥкүү ансаамбыллара- “Кэнчээри”, “Эрэл”, “Одун”, “Өркөн”, “Бриллианты Якутии”, “Дьиэрэй”, “Алаас кыргыттара”.
Дьоро киэһэ ыҥырыылаах ыалдьыттара Бурятия үтүөлээх артыыстара Нонна, Зоригто Тогочиевтар.
Билиэттэр атыыланар сирдэрэ:
- П.А.Ойуунускай аатынан саха театра- 34-13-31
- А.Е. Кулаковскай аатынан норуоттар доҕордоһууларын дьиэтэ – 32-82-96
- Опера уонна балет театра – 36-06-90
- ТЮЗ – 43-35-90
- Киин киинэ тыйаатыра- 34-15-49
- ТРК Туймаада
- Театр эстрады касса
- ЦСП Триумф кассата
- Ону таһынан бу сайтартан электроннай билиэттэри дьиэҕититтэн олорон ылыаххын сөп
TESSERUS.COM
AFISHA. YKT
Сыаната 1300-1500 солк.
Билсэр төлөпүөн 89142968137
Айар Кут кэллэктиибэ
