Чаҕылыйа тыгар сылаас күннээх, сандал сааспыт кыайыы күнүн уруйдуу тыллан, сылаас сиккиэр тыалынан имэрийэ тиийэн кэллэ. Бу күн киһи барыта үөрэр, кыайыы өрөгөйүн уруйдуур. Саха сиригэр Улуу кыайыыны уһансыбыт бары бэтэрээннэрбитигэр, тыыл, сэрии тулаайахтарыгар анаан, саха сирин  Сергей уонна Марфа Расторгуевтар ааттарынан цииркэтэ, дириҥ ис хоһоонноох, кыайыы күнүгэр аналлаах программанан бэтэрээннэри эҕэрдэлээтэ, куорат олохтоохторун сэргэхситтэ.

Дьоҥҥо-сэргэҕэ үөрүү кынатын өрүү бэлэхтиир циркэбит быйыл өрөгөйдөөх 25 сылын туолар, онно даҕатан циркэ дириэктэрин С.В.Расторгуевы кытта сэһэргэстим:

Сергей Васильевич, республикабыт биир киэн туттар цирковой кэллэктиибэ быйыл туох былааннааҕый, туох үлэ-хамнас, тэрээһин ыыта сылдьарый?

Бу ыам ыйын 8-9 к.өрүүтүн ыытар тэрээһиммит. Бу тэрээһини «Мозаика» үҥкүү бөлөҕүн салайааччыта М.З.Сивцев,  «Айар кут» медиа сурунаал салайааччыта Егор Иванов уонна биһиги циркэ коллектива тэрийэн быйыл ыыттыбыт. Дьон-сэргэ быйыл үгүс, сүрдээҕин сэҥээрэн кэлэн сынньанар, бэтэрээннэрбит, кырдьаҕастарбыт кэлэн кыттан үҥкүүлүү, күө-дьаа кэпсэтэллэрин көрөн киһи үөрэр. Сааскы күн чаҕылын бигэргэтэрдии, бары үҥкүү бөлөхтөрө сүрдээх үчүгэйдик үҥкүүлээтилэр, ыллаатылар..

Сергей Василевич, быйыл СР циркэтэ 25 үбүлүөйүн көрсө инникитин туох саҥа былаан баарый?

-быйыл биһиги улахан үлэбит диэн Минск, Литва, Латвия куораттарыгар тыһыынчанан киһилээх саалаларга, 60-н тахса цирковой туруоруулары көрдөрөн, Саха сирин билиһиннэрдибит, билинии ылан үлэлээн кэллибит. Бу маннык айаннарга Саха сирин кэрэтин, культуратын сырдатыы буолар. Онтон быйыл юбилейбыт чэрчитинэн улахан хас да бырайыактардаахпыт. Сылын аайы ыытыллар күрэһи улаатыннарар былааннаахпыт, саастаах, баҕалаах кыттарын ситиһии, ону таһынан тас дойдулартан кытыннарыы былаанныыбыт. Ол курдук  аан дойду таһымнаах «Күн ойуун»-цирковой бырайыак баар, онно күүстээх режиссерскай хамаанда талыллан үлэлиэхтээх. Уонна биир улахан ситиһиибит, иккис цииркэ дьиэтэ тутуллуохтаах, ол кэпсэтии эмиэ хамсаата олоххо киирэр буолбутуттан үөрэ сылдьабыт. Дьэ, ол дьиэбит олоххо киирэрэ буоллар, республикабытыгар улахан бырайыактар хамсааһыннара буолуо этилэр, дьон-сэргэ да кэлиэ этэ.

Сергей Васильевич,  сүҥкэн үлэ бөҕө ыытыллар, тэриллэр ити барыта хайдах эмит үйэтиллэр кыахтаах дуо?

Читайте также:  ЕЩЕ РАЗ О ТРАДИЦИОННОЙ ПИЩЕ САХА, ПИТАЮЩЕЙ ДУХ

-Чахчы бу улахан үлэттэн, тэрээһинтэн тахсар. Маны барытын үйэтитэр, кэлэр көлүөнэ ыччакка хаалларар үчүгэй кинигэ суох. Онон дириҥ ис хоһоонноох, үчүгэй хаартыскалардаах кинигэ-альбом баҕарабыт. Ол иһин «Айар-кут» медиа бөлөҕү кытта ыкса үлэлэһэргэ сүбэлэстибит. Онно урукку кэмҥэ үлэлэспит циркэбит дьонун, үҥкүүһүттэрин, артыыстарын барыларын киллэрэн туран, кэрэхсэбиллээх, ахтыылардаах кинигэ тахсара буоллар, бэрт буолуо этэ. Хас биирдии айан, турне, биһиэхэ цииркэ үлэһиттэригэр барыта история, хатыламмат түгэн. Ону үйэтитэр үтүө, улахан үлэ буолуо этэ.

Сергей Васильевич, бу улахан эппиэтинэстээх. Кэрэ бырааһынньыгы бэлэхтиир сахабыт циркэтин кэллэктиибигэр, үрдүк ситиһиилэри, күүстээх дабайыылары баҕарабыт. Чэгиэн буолуҥ уонна санаабыккыт салаллан, кыһаллыбыккыт кыаллан истин!

Киһи диэн талаана киэҥ уонна кэрэ. Онтон саха циркэтин бары артыыстарын талаана, чахчы да саха сирин алмааһын санатар кэрэлэр. Саха сиригэр циркэ аан бастаан М.Е Николаев уурааҕынан тэриллэн, күн бүгүн сүрдээх чаҕылхайдык үлэлиир. Ити барыта Марфа уонна Сергей Расторгуевтар бэриниилээх, кыһамньылаах үлэлэрин түмүгэ. Онон, күндү мааны Сахабыт сирин Марфа уонна Сергей  Расоргуевтар ааттарынан сахабыт цииркэтин үлэһиттэрин, бу 25 сыллаах үбүлүөйдэринэн эҕэрдэлиибит, чэгиэн доруобуйаны уонна үрдүктэн үрдүк ситиһиилэри, дабайыылары баҕарабыт!

«Айар кут»-медиа сурунаал суруналыыһа, Бээрийэ Кыыһа Хотойук Айгыына🦅