Быйылгы «Кыайыы Вальса» буоларын курдук, Марфа уонна Сергей Расторгуевтар аатынан Государственнай Цииркэ иннигэр өрө күүрүүлээхтик ааста. Бу бырайыагы Саха Цииркэ коллектива, Егор Иванов салайааччылаах Айар Кут медиа-холбоһук, Михаил Сивцев салайар СР спортивнай үҥкүүтүн федерацията кыттыһан тэрийдилэр. Үтүө тэрээһин Александра Заболоцкая сценарийынан уонна Мария Харлампьева — Попова режиссердаах буолла. Кыайыыны үһансыбыт хорсун саллааттар албан ааттарыгар сүгүрүйэн, элбэх киһи мустубут.
Кэнсиэр саҕаланыыта Дьокуускай куорат иккис нүөмэрдээх орто оскуолатын үөрэнээччитэ Афина Васильева “Баллада о матери” хоһоонунан саҕаланна. Кэлбит дьон Улуу сэриини кыайбыт дьоҥҥо сүгүрүйүүнү оҥордулар. Дьэ, ол кэннэ, М.Сивцев салайааччылаах “Мозаика”, А.Павлова салайааччылаах “Өркөн” норуодунай ансаамбыллар, Саха Цииркэтин балета уонна артыыстара Саха Республикатын культуратын үтүөлээх үлэһитэ Любовь Алексеевна Андросова туруорбут “Синий платочек” үҥкүүнү кэлбит дьоҥҥо бэлэх ууннулар.
“Кыайыы Вальсын” бырааһынньыктааҕы кэнсиэригэр Андриан Егоров салайааччылаах оркестр оонньоон, хас биирдии нүөмэри тыыннаата, сэргэхситтэ.
Оркестр тыыннаах доҕуһуолунан “Мозаика” норуодунай ансаамбыл (сал. М.Сивцев)”Иэйии”, “Көмүс күһүн” үҥкүү ансаамбыла (салайааччы Августина Москвитина, хореограф Валентина Сивцева)”Тустеп”, “Падеспань”, “Золотые Погоны” (сал.Светлана Куличкина)”Краковяк” үҥкүүлэри үрдүк таһымҥа үҥкүүлээн бар дьон махталын туттулар. Оркестр доҕуһуолунан Екатерина Колесова, Анастасия Стручкова ырыа ыллаабыттарын уруйдуу көрүстүлэр.
Салгыы Александра Троева салайааччылаах “Вдохновение-Иэйии” үҥкүү ансаамбыла “Фигурный вальс”, “Русский лирический” үҥкүүлэрин ытыс дохсун тыаһынан көрүстүлэр. Ураты нүөмэринэн Мария Жиркова дрессировкалаабыт овчарка ыттарын кыттыыта көрөөччүлэри сэргэхситтэ. Саха Республикатын культуратын үтүөлээх үлэһитэ Мария Соловьева салайар “Кэрэ Эйгэ” үҥкүүһүттэрэ “Вальс Гавот”,”Сударушка” толордулар. Дьэ, уонна бары үҥкүү коллективтара эдэркээн ырыаһыт Эльза Павлова толоруутугар “Балыктаах киэһэтэ” ырыатыгар бары биирдик хамсанан флеш-моб оҥордулар. Ити ырыаҕа үҥкүү кэлиҥҥи кэмҥэ дьон сүрэҕин-дууһатын тутта. Ити ырыаҕа үҥкүүнү Айар Кут медиа-холдинг ыытар бырайыактарыгар куруук ыытыллар буолла. Эльза ыллыыр кэмигэр, сыанаҕа эрэ буолбакка, олорор, турар дьон быыһыгар үҥкүүлээтилэр.
Кэнсиэртиир программа, оркестр доҕуһуолунан, Владимир Заболоцкай уонна Саха Цииркэ балетын, артыыстарын толоруутугар “День Победы” ырыанан түмүктэннэ.
“Кыайыы Вальса” бырайыагы уон сыл анараа өртүгэр, СР култууратын үтүөлээх үлэһитэ Михаил Сивцев тэрийбитэ. Быйыл үбүлүөйдээх сылынан Михаил Захаровичка бу бырайыак кыттыылаахтара уонна “Мозаика” үҥкүүһүттэрэ үрүҥ көмүстэн кутуллубут анал бэлиэни, Өксөкүлээх Өлөксөй аатынан Доҕордоһуу Дьиэтигэр буолан ааспыт “Время танцевать” кэнсиэркэ үөрүүлээх быһыыга майгыга туттарбыттара.(
“Кыайыы Вальса”, дьиҥнээх норуот үөрүүтэ буолла. Кыттар да, кэлэн көрөр, сэргэхсийэр дьон сыллата элбээн иһэллэр. Ону, буолан ааспыт бырааһынньыктааҕы кэнсиэр толору итэҕэттэ. Уруй буоллун, “Кыайыы Вальсын” төрүттээччилэргэ! Кинилэр баар буоланнар, албан ааттаах Улуу сэриигэ охсуспут, тыыннарын биэрбит, кыайыы көтөллөөх эргиллибит хорсун буойуттарга үҥкүү имигэс хамсаныыларынан сүгүрүйүү биир көрүҥүн оҥорбуттарын иһин!
Айар Кут медиа холбоһук
