АЛГЫСТААХ ААРТЫГЫМ

Оҕо эрдэхпиттэн хас сылын аайы таптыыр сайылыкпар, тыабар күѳх сайыммын атаарарым. Олорор нэһилиэкпиттэн тэйиччи турар, сатыы сылдьар киһиэхэ айана ыраах буолан, үѳрэҕим да кэмигэр сырыы кѳлѳ кѳһүннэр эрэ, күнүнэн даҕаны эргиллэн куруутун сүрэхпинэн-быарбынан, курдаттыы сайылыкпар талаһарым. Сылгыһытынан сайыннары-кыһыннары сылы эргиир тыаҕа олорор булчут таайдарбын кытары алтыһан, хара үлэҕэ кыттыһан, окко-маска сылдьыһан… Ардыгар аттанан-таймаланан кыра булдуттан, кѳтѳр кынаттааҕыттан саҕалаан сааскы, күһүҥҥү, кыһыҥҥы тымныы күннэри баттаһан туран адьырҕа кыылы кытары бултаһар буоларым…

Хайаатар даҕаны сатыы сылдьан дойдубун, сирбин-уоппун кэрийэрбин, тутатына ырыа хоһуйан ыллыы-ыллыыбын күнү-күнүнэн кэтээн кѳрѳрбүн быдан ордоробун.

Сахабын дии-дии түѳспүн тоҥсумматарбыт да, сиэрдээх майгылаах киһи кэминэн, айылҕа оҕото буоларбынан Дьааҥым биир ураты кэрэ сиригэр тѳлкѳм түѳрэҕэ түстэнэн, кыракый  түѳлбэм, Арыылааҕым сэмэй дьонун быыһыгар улаатан, киһи хара буолан үѳскээбиппиттэн киэн тутта саныыбын.

Маҥнайгы хоһооммун суруйан холонон кѳрүүм үѳрүүлээх күнүттэн ылата, ѳр сыллар устатыгар туох саҥаны билбиппин, тугу саныырбын, дойдубун, чугас дьонум тапталын эдэр киһи олоҕу кѳрүүтүнэн, иэйии умсулҕаныгар убанан айбыт хоһооннорбун түмэ тутан, бастакы “Алгыстаах аартыгым” диэн, хомуурунньукпар тиһиликтээн күн сирин үтүѳтүгэр, дьоммор-сэргэбэр, ааҕаччыларбар, айар куттаах ырыаһыттарга баҕардар туох эмит саҥаны, ханнык эмит санааҕа, түмүккэ, дууһаны сылаанньытарга, күннээҕи түбүктэн аралдьыйан да ыларга бу татым соҕус тыллардаах хоһооннорбун күндүлээн эһиэхэ утары уунабын.

Читайте также:  “Модун күүс, өркөн өй, ыра санаа” – Ньурба чулуу ыһыаҕа

Христофор Саввинов

              Алгыстаах аартыгым

Сайылыгым тыалын кытта ымыы буолан куппар иҥпит,
Сиртэн сүппүт оҕо сааспын ахтар-суохтуур сүрэҕим.
Олох күүстээх долгунугар букатын да ыллараҥҥын,
Хат иккиhин эргийбэттии, олох сүппүт эбиккин дии.

Үрдүк таас хайалаах хотугу дойдубар,
Ол, ыраах сир халлаан силбэhэр киэбигэр,
Киэҥ ыырдаах айаным нэлэйэн иннибэр,
Алгыстаах суолбунан аартыкпын тутустум.

Ситэ тылла илик иэйиим сааскы тэйии туллук курдук,
Санаам бүппэт дуолун устун сырса оонньоон куотар, саhар.
Дойдум сылаас тыына киирэн куппун-сүрбүн тууйа тутар,
Айар алып кынат тиhэн хоhоон дьүhүн кубулуйар.

Ахтылҕан дууhабын аймыырын аhардан,
Хараҕым уутунан сууйбаппын билэбин.
Ол иhин ырыабар ахтыллар дойдубун,
Кѳрбүттүү дьүhүйэн уоскулаҥ булабын.

Ол эрэн иккиhин эргиллэн тѳннүѳҕүм,
Оҕо саас кытылын тилийэ сүүрүѳҕүм,
Дьэ уонна ыар баттыгы ыhыктан этиэҕим:
– «Дорообо, дойдум, бу мин кэллим, эргилинним!»

2012 с.