Улуу бөлөһүөкпүт Алексей Елисеевич Кулаковскай суруйан хаалларбыт «Ойуун түүлэ» дириҥ ис хоһоонноох поэматынан ускуустуба үтүөлээх деятелэ, Арассыыйа норуодунай артыыһа Андрей Борисов Олонхо театырыгар туруоруута олунньу 7 күнүгэр «Өксөкүлээх Өлөксөй» аатынан култуура дыбарыаһыгар премьерата киэһээ алта аҥаартан буоларыгар ыҥырабыт. Кэлэн көрөн-истэн, дуоһуйан, кэрэ-модун оонньууну биһирээн бараргытыгар баҕарабыт. Суруйааччыта, айымньыта, туруоруута – барыта сүдү! 

Режиссер ассистена Хабырыыс Мэнкээрэп, сценаристар Маайа Власьева уонна Миитэрэй Хойутаанап. Худуоһунньуктар Михаил Егоров уонна Сардаана Федотова. Тыыннаах доҕуһуол – Руслан Габышев, Иванида Алексеева, Вероника Лыткина уонна Прокопий Сыроватскай.

Быйыл поэма 110 сааһын туолла, Өксөкүлээх оччотооҕуга суруйарыгар, XX-с үйэ саҥатыгар, киһи аймахха суоһуур кутталлары – аан дойду сэриитин, революциялары, экология алдьаныытын, сири былдьаһыгын, омуктар улуу көһүүлэрин, кыра омуктар эстэр кутталламмыттарын айымньы нөҥүө эппитэ. Айымньыга саха омук глобализация усулуобуйатыгар хайдах симэлийэн хаалбакка чэчирээн олоруон сөбө этиллэр – ол үөрэҕи баһылаан сайдааһын, ону аныгы кэм сахалар син толордубут диэххэ сөп. Поэма ис хоһоонун Алексей Елисеевич саха интеллигенциятыгар анаан суругар сайыннаран хатылаабыта. Поэмаҕа этиллэр кутталлар билигин да тоҕоостоохтор – соҕурууттан Кытай экономическай сабыдыала кэҥээбитэ хайыы-үйэ ыраатта, арҕаа дойдулар култууралара-үгэстэрэ биһиэхэ эмиэ сабырыйаллар, дьэ бу быыһыгар тылбытын-култуурабытын, итэҕэлбитин, сирбитин сүтэрбэт туһуттан сахалар билигин күүстээхтик мөхсө-үлэлии олоробут. Дьэ оннукка тоҕоостоохтук ис эйгэбитигэр күүс-сэниэ эбинэ, куппутун-сүрбүтүн бөҕөргөтүнэ саха баараҕай-былыргы, өбүгэлэриттэн бэриллибит олоҥхобутун ыстаан-тупсаран көрдөрөр театырбытыгар кэлэрбитигэр кыах бэриллэрэ тоҕо баҕас кэрэтэй-үчүгэйэй!

Читайте также:  Гаврил Менкяров: «Артыыс идэтэ – ыраахтан ыллыктаммыт ыра санаам»

Виктор Борисов – Алтан Түһүнэй.

Олунньу 7-8 күннэригэр А.Е. Кулаковскай-Өксөкүлээх Өлөксөй аатынан Норуоттар доҕордоһууларын дьиэтигэр тыйаатыры таптааччыларга үөрүүлээх тэрээһин  — А.Е. Кулаковскай-Өксөкүлээх Өлөксөй айар үлэтин 120 уонна бу айымньы суруллубута 110 сылларыгар анаммыт “Ойуун түүлэ” поэматынан испэктээк буолар. Туруорааччы-режиссер РФ ускуустубатын үтүөлээх диэйэтэлэ, РФ народнай артыыһа, А.Е. Кулаковскай аатынан Судаарыстыбаннай бириэмийэ лауреата Андрей Борисов. Режиссер – Гаврил Менкяров. Сценаристар Майя Власьева уонна Дмитрий Хоютанов. Худуоһунньуктар Михаил Егоров уонна Сардаана Федотова. Тыыннаах доҕуһуол – Руслан Габышев, Вероника Лыткина уонна Прокопий Сыроватскай.

Өксөкүлээх Өлөксөй XX-с үйэ саҥатыгар киһи-аймахха суоһуур кутталлары – аан дойду сэриитин, революциялары, экология алдьаныытын, сир былдьаһыгын, омуктар улуу көһүүлэрин, кыра омуктар эстэр кутталламмыттарын  “Ойуун түүлэ” поэматын нөҥүө эппитэ. Айымньыга саха омук глобализация усулуобуйатыгар хайдах симэлийэн хаалбакка чэчирээн олоруон сөбө этиллэр. Поэма ис хоһоонун Алексей Елисеевич саха интеллигенциятыгар анаан суругар сайыннаран хаалларбыта.

А.Е. Кулаковскай-Өксөкүлээх Өлөксөй “Ойуун түүлэ” философскай поэматынан турар испэктээк сүрүн дьоруойа – Айанньыт (Егор Егоров). Өксөкүлээх Өлөксөй Аан дойду олоҕун анаарыыта, төрөөбүт дойдутун инники дьылҕатын, сайдар кэскилин туһунан дириҥ философскай толкуйа Айанньыт уобараһынан арылхайдык көстөр. Кини “ыраах айан диэн ылларбат, уһун айан диэн утаабат, күүстээх айан диэн мөлтүөбэт” Улуу эбэлэринэн борохуот аалынан устар. Устан тиийбит кытылларыгар Аан ийэ дойду дьонугар-сэргэтигэр суоһуур алдьархайдары – улахан уонна кыра омук сыһыаннаһыыларын, өрөбөлүүссүйэни, сэриини, аччыктааһыны “көрөр”. Испэктээк оонньуур дьоно: Айыы Намыһын ойуун – Дмитрий Хоютанов, Кыаһааннаах ойуун – Павел Колесов, Сир Ийэ хатыҥ – Анастасия Алексеева уо.д.а.

Читайте также:  Премьера Театра Олонхо «Өрүс бэлэхтэрэ» - “Дары реки”

Олунньу 6 күнүгэр Егор Иванов салайааччылаах “Айар Кут” Медиа бөлөх үлэһиттэрэ  испэктээк генеральнай репетициятыгар сырыттыбыт, хайдах быһыылаахтык айыллан-чочуллан тахсарын илэ харахпатынан астына-дуоһуйа көрдүбүт. Түгэнинэн туһанан, ытыктабыллаах Андрей Саввич Борисовка репетиция быыһыгар быыс булан, биһигини кытта ирэ-хоро кэпсэтэн, сүбэ-соргу биэрбитигэр уонна инники өттүгэр “Айар Кут” Медиа бөлөҕү кытта бииргэ үлэлэһэри торумнаспытыгар улахан махталбытын тиэрдэбит.

Айыына Донская