Соторутааҕыта Аксения, Наталья Посельскаялар аатынан хореографическай колледж саалатыгар олус сэргэх дьоро киэһэ буолан ааста. Үс олоҥхоттон быһа тардыыга Үөһээҥҥи Үрдүкү күүс буойун дьахталлара Орто дойду олоҕун араҥаччылыыр аналларын олоҥхо тылынан, сахалыы тыыннаах муусуканан уонна үҥкүү хамсаныытынан ситэрэн-хоторон биэрэллэрин дьиҥ-чахчы дууһабытынан ылынан, сүрэхпитинэн сөбүлээн көрдүбүт.

Николай Абрамов «Удаҕаттар Уолумар, Айгыр икки» испиктээкилтэн быһа тардыы сценарийын филологическай наука кандидата Агафья Еремеевна Захарова суруйда. Көстүүм худуоһунньуга Софья Колесова, муусуканан киэргэтии Андриан Егоров, вокал- Варвара Степанова, туруорааччы режиссер- СР культуратын үтүөлээх үлэһитэ Сима Толстякова. Бу айар үлэ 2005 сыллаахха, Соҕуруу Кореяҕа, »Маска» норуоттар икки ардыларынааҕы фестиваль кыайыылааҕа.

“Кыһыл Сарбынньах  суһуохтаах Кыламан Кымньыы удаҕан” испиктээкилтэн быһа тардыы Николай Баишев сценарийынан туруорулунна. Көстүүм худуоһунньуга Дария Дмитриева, туруорааччы режиссер СР культуратын үтүөлээх үлэһитэ Саргылана Адамова-Алтан Кыыс, туруорааччы балетмейстер- СР культуратын үтүөлээх үлэһитэ Сима Толстякова.

“Соргулаах суохапчы суолунан» испэктээкил  Николай Баишев, Майя Власьева сценарийынан туруорулунна. Муусуканан киэргэтии- Николай Петров, көстүүм худуоһунньуга- Зинаида Софронова, вокал- Варвара Степанова, туруорааччы балетмейстердар- Долана Федотова, Екатерина Павлова, консультант- СР культуратын үтүөлээх үлэһитэ Сима Толстякова, туруорааччы режиссер- Зоя Попова

Дьоро киэһэҕэ кыттыыны ыллылар:

Олоҥхо тыйаатырын артыыстара — В.Михалев, А.Соловьев, Д.Захаров,П.Иванов, А.Захаров, Е.Егоров, В.Саввинов, Ю.Санникова, тыыннаах доҕуһуолу оҥордулар — В.Степанова, К.Николаева, В.Баланова, Л.Филиппова, В.Иванов, В.Скрыбыкин, В.Исаков, В.Лыткина, П.Сыроватскай уонна »Эрэл» үҥкүү народнай тыйаатыра. Балетмейстер – СР үтүөлээх артыыската Долана Федотова, уус-уран салайааччыта СР культуратын туйгуна Екатерина Павлова, консультант – СР культуратын үтүөлээх үлэһитэ Сима Толстякова, Олоҥхо директора Мария Турантаева.

Читайте также:  Художник с Сулгаччы

Испиктээкилгэ  Олоҥхо тыйаатырын “Эрэл” народнай үҥкүү тыйаатырын саха үҥкүүтүн айар лабораториятын үҥкүүһүттэрэ, олоҥхону ааҕар артыыстара, киһи кутун күүрдэр удаҕан ырыаларын таһаарар, араас тыаһы-ууһу таһаарар доҕуһуолдьуттар үрдүк маастарыстыбалаахтарын көрөөччүгэ итэҕэттилэр.Буойун дьахталлар уобарастарын, кинилэр олохторун, араҥаччылыыр күүстэрин көрөөччүгэ тиэрдиини туруорааччы балетмейстердар, режиссердар туруоруулара күүстээҕэ, үҥкүү искусствотын баһылаабыттара көстөр.

Испиктээкил саҕаланыытыгар көстөр тоҕус былас суһуохтаах Уолумар Удаҕан, аҕыс былас суһуохтаах Айгыр Удаҕан кыргыска кэтэр буойун таҥастарын кэтэн, сүһүөхтээх бэйэлэрэ сүгүрүйэн туран, төлкөлөөх түөрэхтэрэ түһэн, кыталык кыыс буолан кыырай халлаан көстүбэт мындаатыттан Орто дойду олоҕор түһэн кэлэллэрэ үҥкүү хамсаныытынан тиэрдиллэр. Аан дайдыны араҥаччылыыр, хара күүһү үтэйэр аптаах сата тааһы түһэрэн, Эмээхсин, кыһыл сарбынньах суһуохтаах Кымньыы кыламан удаҕан диэн улахан кыыска иҥэрэн, сата тааһы Кудай Бахсыга илдьэр быраабы биэрэн атаарыллар. Айыы бухатыыра абааһылыын охсуһан кыайан, Улуу Уус кутун иҥэрэн, Аҕа ууһун Ийэ кыыла Хара Кыталык буолан көтөн кэлэн, ыраас уолан үс кутун үһүс төгүлүн эргитэрин этэр уонна айылҕа айыытынан үөһээ Айыылар ыйыыларынан удьуор уус буолар анал бэлиэтин суохапчыны туттарар.Түмүгэр, улуу уус буолуохтаах Уолан эт-сэниэ баранар эттэниини этэҥҥэ ааһан, ыарахантан чаҕыйбат, моһолтон куотар модун санааланар.

Бүтэһигэр,
Айылҕа эргиирин батыһыым,
Айыылар этиилэрин салҕыым,
Өбүгэ үгэһин үтүктүүм,
Үтүө айымньыны үөдүтүүм-үксэтиим,
Туомунан бааллыым,
Оҥорорбун оҥорон иһиим,
Ылыммыппын ыпсаран иһиим,
Кэмигэр ситэриим,  тоҕооһугар толоруум,
Үрүҥ күн үтүөтүн тутуум,
Киһини киһи гынан киэргэтиим,
Саханы саха гынан сандаарыым,

Өбүгэттэн быстыбат ситимнэниим –диэн кэскиллээх саҥаны саҥарар. Испэктээкилгэ көстөр Удаҕаттар Уолумар, Айгыр икки,  кыһыл сарбынньах суһуохтаах Кымньыы кыламан удаҕан, Хара Кыталык уобарастары чаҕылхайдык арыйдылар. Хас биирдии хамсаныыларыгар бу мифическэй уобарастары үҥкүү хамсаныылара дьиҥ тыыннаатылар, онуоха тыыннаах доҕуһуол муусука, сырдыыр, хараҥарар уот көрөөччүгэ үҥкүүһүттэр, режиссердар, балетмейстердар биир турукка, биир өйгө-санааҕа киириилэрин, профессиональнай таһымнара  үрдүгүн көрдөрдүлэр.

Испэктээкил бүтүүтүгэр дьоро киэһэни тэрийээччилэр АйарКут айар медиа салайааччытыгар Егор Ивановка, хореографическай училище директорыгар Марина Морозовнаҕа махталларын тиэртилэр. Сцена уотун-күөһүн туруоруутун Иннокентий Васильев салайааччылаах Сахаян Петров, Андрей Софронов, Артем Осипов саталлаахтык оҥордулар. Көрөөччүлэр махталларын бэлиэтин күүстээх ытыс тыаһынан биллэрдилэр.

Читайте также:  "МОЛОДОСТЬ ЭРКЭЭНИ" 50 ЛЕТ
«Небесные воительницы»

                                           Айар Кут медиа бөлөх