Сэтинньи 30 күнүгэр “Кыталыктыын дайыы – 2019” диэн өрөспүүбүлүкэтээҕи үҥкүү бөлөхтөрүн аһаҕас көрүү-күрэҕэ  Мэҥэ-Хаҥалас Майа сэлиэнньэтигэр “Кыталык” оҕо-ыччат эстетическэй киинигэр буолан ааста. Көрүү-күрэх аар-саарга аатырбыт РФ үтүөлээх самодеятельнай коллективын аатын сүгэр “Кыталык” народнай үҥкүү ансаамбыла 40 сылыгар ананна.  Манна өрөспүүбүлүкэ араас муннуктарыттан 32 үҥкүү коллектива, 401 оҕо уонна улахан киһи кытынна. Күрэх сааһынан арааран 3 категориянан барда:13 саастарыгар дылы, 14-17 саастаахтар уонна 18 сааһыттан үөһээ.

“Кыталык” народнай үҥкүү ансаамбылын төрүттээччи, уус-уран салайааччы – Россия уонна Саха өрөспүүбүлүкэтин үтүөлээх үлэһитэ, РФ “Душа России” национальнай премиятын лауреата, Саха өрөспүүбүлүкэтин культуратын уонна искусствотын бочуоттаах үлэһитэ, Саха өрөспүүбүлүкэтин үөрэҕириитин туйгуна, Мэҥэ-Хаҥалас улууһун бочуоттаах олохтооҕо Василий Павлович Винокуров. Кини 1978 сыллаахха Кемероватааҕы культура государственнай институтун хореографияҕа салаатын бүтэрээт Майа сэлиэнньэтигэр оройуоннааҕы культура дьиэтигэр үҥкүү куруһуогун тэрийбит. 1979 сыллаахха “Кыталык” диэн ааттаах үҥкүү ансаамбыла буолбуттар. Саҥа тэриллибит ансаамбылга олохтоох мелодист Алексей Леонтьевич Попов “Кыталык” диэн ааты иҥэрбит. 1979 сыл ахсынньы 7 күнүгэр “Кыталык” ансаамбыл “Өрөспүүбүлүкэҕэ бастыҥ үҥкүү коллектива” ааты аан бастаан ылар чиэскэ тиксибит. Ити үөрүүлээх күнү Василий Винокуров ансаамбыл төрүттэммит күнүнэн ааҕар. 2011 сыллаахха “Кыталык” ансаамбыл аан бастакынан Россия 23 коллективын иһигэр киирэн “Россия үтүөлээх народнай коллектива” ааты сүкпүт.

“Кыталыктыын дайыы” – 2019 күрэх кыттыылаахтара бэйэлэрин анал программаларын таһынан “Кыталык” ансаамбыл репертуарыттан туруорбут үҥкүүлэрин көрдөрдүлэр. Ол курдук көрөөччү улахан биһирэбилин ылбыт “Сайылык  оҕолоро”, “Якутяночка”, “Саҥа хаар” уонна да атын үҥкүүлэр бааллар. Үҥкүү коллективтара бары да үрдүк таһымнаахтарын көрдөрдүлэр. Түмүккэ Гран-При хаһаайына Аллараа Бэстээхтэн “Ай-тыын” үҥкүү коллектива буолла (салайааччы Нюргустана Черкашина).

Читайте также:  ИЙЭ ТЫЛ, СУРУК-БИЧИК КҮНЭ

13 саастарыгар дылы бөлөххө 1-гы степеннээх лауреат аатын Төхтүрдээҕи “Манчаары” үҥкүү бөлөҕө ылла (салайааччылар Татьяна Говорова уонна Елена Тарабукина). 2-с степеннээх лауреат Уус-Майаттан “Саммерс герлз” бөлөх буолла. 3-с  степеннээх лауреат – Төҥүлүттэн “Кустук” бөлөх (салайааччы Марианна Цыпандина).

14-17 саастаахтар ортолоругар 1-гы степеннээх лауреат аатын Төхтүрдээҕи “Манчаары” үҥкүү бөлөҕө ылла (салайааччы Светлана Маркова). 2-с степеннээх лауреат аатын Уус-Алдан улууһун Бороҕон сэлиэнньэтиттэн “Кэнчээри” Россия  үтүөлээх народнай үҥкүү бөлөҕө сүктэ (салайааччы Ульяна Ноговицына). 3-с  степеннээх лауреат – Аллараа Бэстээхтэн 2-с нүөмэрдээх орто оскуола үҥкүүтүн бөлөҕө (салайааччы Иван Аржаков).

18 сааһыттан үөһээ категорияҕа 1-гы степеннээх лауреат аатын Мэҥэ-Хаҥалас улууһун Лоомтука сэлиэнньэтиттэн “Тэтим” үҥкүү бөлөҕө ылыан ылла (салайааччы Любовь Попова). Манна даҕатан эттэххэ, бу бөлөххө эдэр дьону кытта тэҥҥэ аҕам саастаах дьон кытта үҥкүүлүүллэр. Олор истэригэр 70 сааһын ааспыт профессиональнай үҥкүүһүт  Иван Семенович Ларионов баар. Кини аан бастаан сценаҕа 57 сыл анараа өттүгэр тахсыбыт. Онтон бэттэх Иван Семенович үҥкүүнэн тиһигин быспакка дьарыктанар. 2-с степеннээх лауреат – Павловскайтан “Күбэйэ” ансаамбыл (салайааччылар Станислав Николаев уонна Юлия Колосова). 3-с  степеннээх лауреат аатын Төхтүртэн “Арчы” бөлөх ылла (салайааччы Екатерина Дмитриева).

“Айар кут” номинация хаһаайына Хорообут орто оскуолатын коллектива буолла (Нюрбина Брызгалова). “Сайдам” номинацияҕа Чурапчы Чакырыттан “Мичийээнэ” үҥкүү бөлөҕө тигистэ (салайааччы Лидия Миронова). “Бастыҥ көстүүм” номинация – Майатааҕы 1-гы орто оскуола (Никандр Борисов). “Үҥкүүгэ бэриниилээх” номинацияны Төхтүртэн  Екатерина Винокурова ылла. “Кэрэҕэ тардыһыы” номинация хаһаайына – Горнай Мытааҕыттан “Тэтим” этно-үҥкүү бөлөҕө ылла (салайааччы Изабелла Максимова). “Кыталык Куо” аатын Төхтүртэн Дайаана Маркова сүктэ.

Айыына Донская