Күндү Ньурбам дьоно!

Күндү Ньурбам дьоно!

Ньурба ыһыахтара көлүөнэттэн көлүөнэҕэ бэриллэн кэлбит үтүө үгэстэрдээх уонна ону утумнаан салҕанан бара турарынан уратылаах. Саамай улахан уратыта Ньурба хас биирдии киһитэ ис сүрэҕиттэн сүргэтэ көтөҕүллэн ыһыахтыыра, хастыы да түүннээх күн тохтообокко тойукка, оһуокайга кыттара буолар. Үгэс буолбут араас тэрээһиннэрбит бүтүн Саха сиригэр барытыгар тарҕанан, саҥалыы тыыннанан көстүбүт өрүттэрэ элбэхтэр. 1995 сыллаахха кыайыы 50 сылыгар аналлаах ыһыахха 50 аттаах уолаттар түһүлгэҕэ киириилэрэ кэлиҥҥи сылларга ыһыахтарга үгэс буолан араастаан тэнийбиттэрэ. 1997 сыллаахха Баһылай Манчаары спартакиадатыгар Ньурбаҕа 32 улуус кыттыылаах «Олоҥхо оонньуулара» диэн ааттанан түөрт күннээх түүн, үрүҥ уоланнар күрэхтэрэ ыытыллыбыта. Дорҕоонноох куолаһынан тыһыынчанан дьону сарын санныттан даҕатан, ил эйэни, дуоһуйууну  олохтоон түүнҥү өртүгэр аан бастаан Никифор Семёнов сылтан сыл буолар «Үрүҥ түүн» кэнсиэрдэрэ тиһигэ ууруллубута. Аны ыһыах аһа — үөлэ, кымыһынан айах тутан үтэһэлээх этинэн күндүлүүр үгэс, ураһа аайы нэһилиэктэр ыалдьытымсах  буолуу көрүҥнэрэ эмиэ биһигиттэн төрүттэммитэ. Айыы үөрэҕин тутуһан туругуруу ыһыахтарын өрө тутан сыл ахсын тохтооботко дабатан Үрүҥ Аар Тойонҥо тиийэ силигин ситэриини эмиэ биһиги аҕалбыппыт, Олоҥхо ыһыахтарыгар улахан тирэх буолбута. Ыһыахха саха киһитэ кымыһы иһиитин сиэрэ — туома силигэ сиппитэ, иччилээх уус тыллаах К.Д.Уткин үөрэҕэ, ол кэрэ көстүүнү көрдөрүүтэ Ньурба сириттэн саҕаламмыта. Саха киһитэ бэйэтин философиятын, тулуурдаах, дьулуурдаах, дьаныардаах буолуутун кэлэр көлүөнэҕэ тиэрдэн иһиэҕиҥ. Билигин бу кэлбит көлүөнэ салайааччылара утуму — ситими быспакка үйэлэргэ салҕана тураллар. Ол да иһин олоҥхобут, тойукпут, уһун оһуокайбыт, үгэстэрбит үйэлээхтэр. Үтүө үгэстэрбитин илдьэ сылдьан, өйбүтүнэн – санаабытынан бары бииргэ кыттыһан тэрийэр ыһыахпыт уһун тыыннаныа. Дойду сураҕырыа, киэҥ кэскиллэниэ. Билиҥҥи  кэмҥэ үлэлии сылдьар эдэр көлүөнэҕэ онно ситиһиини баҕарабын.

Т.П. Олесова, СӨ култууратын үтүөлээх үлэһитэ.