Күөх Ньурба үбүлүөйдээх ыһыаҕа

Улууспут биир чулуу уола биллиилээх поэт, суруйааччы, государственнай общественнай деятелэ, сэбиэскэй партийнай үлэһитэ, 30-с сс. таһаарыылаахтык үлэлээн дьон-сэргэ махталын ылбыт Сергей Степанович Васильевы чиэстээн Ньурба улууһун дьоно, салалтата улуустарын 195, политическай деятеллэрэ А.Г.Габышев 120, сэрии ветерана Ф.С.Донской 100 сылларынан үбүлүөйдээх ыһыахтарыгар ыллаан кэллибит.

Сергей Васильев хоһоонугар Е.Поликарпов айбыт «Киэҥ Ньурба» диэн гимн ырыаларын Арассыыйа үтүөлээх Образцовай кэллэктиибэ, «Кэнчээри» норуодунай ансамбыла Бочуоттаах ыалдьыт быһыытынан кэлэн гииммитин толорон барарыгар ыҥырабыт диэн Дьокуускайтан автобуһунан кэлэн тиэйэн, үс күнү быһа сылаас интэринээккэ түһэрэн, ытыс үрдүгэр илдьэ сылдьан ырыабытын истэн, маанылаан аҕаллылар.

  Ньурбалар биһиги Сергей Васильевпытын олус убаастыылларын, махтаналларын, сылаастык сыһыаннаһалларын «Кэнчээрилэргэ» көрдөрөн итэҕэттилэр. Бу күннэргэ Ньурбалар С.Васильев туттарбыт кини аатынан паркаларын тупсарар бырагыраама суруйан РФ-тан 40 мөлүйүөнү ылбыттар. Ол тутуу бүттэҕинэ аһыллыытыгар хайаан да кэлэҕит диэн өссө ыҥырдылар.

Ыһыах «Кыталыктаах» диэн киэҥ-куоҥ, чээлэй күөх хонуулаах, хатыҥ-талах чараҥнардаах улуу алаастарыгар буолла. Сүрүн кэнсиэрдэри, күрэстэри киин трибунаҕа ыыппыттара сүрдээх табыгастаахтык тэрийбиттэрин бэлиэтиир наада. Биһигини икки төгүл киин трибунаҕа, биирдэ түһүлгэҕэ ыллаттылар. Хас биирдии ырыабытын дохсун ытыс тыаһынан биһирээтилэр. Солистар Юля Сивцева, кырачаан Күннэй Гоголева (Мындааба, 2-с кыл.), Доминик Васильев (гимназия), Полина Тимофеева ырыалара эмиэ дохсун ытыс тыаһынан кэрэхсэннилэр. С.Васильев тылыгар «Киэҥ Ньурбаны» ыллаатахпытына сүһүөхтэригэр туран ыллаһаллар, астыммыттарын биллэрэн “Браво!!! Бис!!!” бөҕө түһэрэллэр. Кэнсиэр кэнниттэн кэлэн эҕэрдэлииллэр, хаартыскаҕа түһэрэллэр, сөҕөллөр, махтайаллар.

    Лицей интернатыгар түһэрэн тото аһатан, ыһыах кэмигэр эбиэккэ уонна киэһээ нэһилиэктэр ураһаларыгар ыҥыран тото аһаттылар. Надежда Афанасьева диэн Музыкальнай оскуола учууталын куратор быһыытынан сыһыарбыттара бүөбэйдэстэ, дьиэтигэр эбии ас астаан аҕалан аһатар, оҕолор ырыаларын үрдэ суох хайгыыр, астынар, ымсыырар. Музыкант теоретик быһыытынан оҕолор толоруулара профессиональнай таһымнааҕын бэлиэтиир, кэлэн семинар биэрэргэ ыҥырар.

 Ньурба бэйэтэ куорат куорат курдук элбэх тупсаҕай таас тутуулардаах, 10000 нэһилиэнньэлээх, сүрүн уулуссалара асфалламмыт. Баһылыктара А.М.Иннокентьев, култуура салалтатын началыньыга аатырбыт Дархан оһуохайдьыт Р.М.Тихонова ыалдьыттары анаан- минээн күндүлээтилэр, бэлэхтэрин туттардылар.

   Бу сырыыны «Айар кут» сурунаал айар кэллэктиибэ (сал.Е.В.Иванов) Ньурба салалтатын кытта тэрийэн ыыттылар. Сурнаал кэлэр №-гэр ыһыах, “Кэнчээри” туһунан киэҥник сырдатыллара былааннанар. Олохтоох салалта сурнаал салалтатыгар элбэх артыыстары аҕалан ыһыаҕы киэргэппитин иһин махтаннылар. Ол курдук «Айар Кут» тэрийиитинэн СӨ кулууратын үтүөлээх үлэһитэ М.З.Сивцев салайар «Мозаика» ансамбыла, «Кэнчээри» выпускницата СӨ үтүөлээх артыыската Варя Аманатова, сахалыы кырыымпа автора Руслан Габышев, култуура үтүөлээх үлэһиттэрэ Анастасия Кардашевскайа, ырыаһыт Алевтина Лукинова кыттыыны ыллылар. Киин түһүлгэҕэ буолбут концерга «Кэнчээри» аҕыс нүөмэри биэрэн Уус Алданнар Сергей Васильевпыт аатын ааттатан астынан кэллибит.

  Үрдүк таһымнаахтык көрсүбүт Ньурба улууһун салалтатыгар, улуус баһылыгар Алексей Михайловичка, управления начаалыньыгар Розалия Михайловнаҕа, тэрийсибит «Айар Кут» сурнаал хамаандатыгар, сал. Егор Валерьевичка барҕа махталбытын тиэрдэбит!!!

Василий ПАРНИКОВ, РФ Үтүөлээх Образцовай, «Кэнчээри» народнай ансаамбыл салайааччыта.