Саха сирин олохтоохторун уутун аймаабыт Саха НКИК ханаалыгар “Эн Сулускун 50+” бырайыак финала буолан ааста. Кэтэһиилээх кэрэ кэми бары да кэтэстибит аҕай. Олунньу ыйтан саҕаламмыт бырайыакка уопсайа 318 сайаапка киирбит, 256 киһи сүүмэрдээһини ааспыт, түмүктүүр түһүмэххэ 10 киһи киирбит.

Дьэ, түмүктүүр финалга Айар Кут медиа бөлөх салайааччыта Егор Иванов уонна суруналыыс Лариса Аввакумова буолан, устуудьуйаҕа олорон, норуоттан тахсыбыт талааннары дьиҥ кулгаахпытынан иһиттибит, харахпытынан көрдүбүт. Бырайыагы саҕаланыаҕыттан түмүккэ дылы норуот сөбүлүүр ыытааччылара Индира, Георгий Белоусов иэйэн туран ыыттылар.Бу сырыыга көрөөччүлэринэн араас хаһыаттар суруналыыстара, блогердар, сонуну тарҕатааччылар, кыттааччылар аймахтара кытыннылар. Дьүүллүүр Сүбэҕэ СР норуодунай артыыһа,  СР үтүөлээх артыыһа Алексей Егоров, саха оператын примата, Россия үтүөлээх артиската, СР норуодунай артыыската Нина Чигирева, СР норуодунай артыыһа Владимир Заболоцкий, СРүтүөлээх артыыската Владлена Бурнашова -Сахаайа олордулар.  Кыттааччылары байааҥҥа доҕуһуоллаатылар- концертмейстер Раиса Крылова, Владислав Кривошапкин, Николай Стручков, Светлана Капитонова ыллыыр дьонноругар көмөлөһөн дьон-сэргэ махталын туттулар.

Бастакы түһүмэххэ, “ Эн Сулускун50+”  бырайыак кыттыылаахтара саха эстрадатын биллиилээх ырыаһыттарын кытта ыллаатылар. Куоластарыгар сөп түбэһэр эбэтэр бэйэлэрэ билсэр ырыаһыттарын кытта олус сөп түбэсиһэн, араас ырыалары бэлэхтээтилэр. Көрөөччү дууһатын тутар хит буолбут ырыалар бииртэн биир ылланан истилэр.

Кыттааччылары быһа эфиринэн, айар командировкаҕа сылдьар Саха НКИК салайааччыта Олег Марков истиҥник эҕэрдэлээтэ.

Иккис түһүмэххэ кыттааччылар соло толордулар. Хас биирдии ырыаһыкка дьүүллүүр сүбэ бэйэлэрин санааларын эттилэр, бары да талааннаахтарын бэлиэтээтилэр. Биирдиилээн толорууну тыыммакка да олорон иһиттибит:

Читайте также:  Презентация медиа проекта "АЙАР КУТ"

Иван Васильевич Данилов (72 с., Бүлүү, Өкүндү) Инн.Артамонов т., Денис Данилов мел. “Мин мантан сэриигэ барбытым”, Нюргуяна Николаевна Кузьмина (53с., Дьокуускай, Марха)Григ. Белкин т., Ал.Лукьянов м.”Грабитель”, Аркадий Гаврильевич Самсонов (75 с., Уус Алдан, Танда)Кс.Уткин т., Вал.Платонов мел. “Оккоолойдоон Оккоолой”, Геннадий Афанасьевич Филиппов (56 с., Мэҥэ Хаҥалас, Чыамайыкы) Макар Хара т., Анаст. Варламова м. ”Ыһыах”, Екатерина Николаевна Ефремова (62с., Хаҥалас, Тит Арыы) Архип Абаҕыыныскай т., Марк Жирков м.”Күрүлүөс күргүөм күннэргэ”, Вячеслав Макарьевич Попов(64с., Дьокуускай)Фрэнк Синатра ”Мой путь”, Владимир Иванович Иган (82 с.,Дьокуускай)Баал Хабырыыс т., Захар Винокуров м. “Сүрэҕим тэптэҕиэн”, Иван Романович Чириков ( 70с., Томпо, Мэҥэ Алдан)П.Тобуруокап т., Егор Кампеев мел.”Ньургуһунна бэлэхтээ”, Лонгина Пантелеймоновна Бережнева (59 с., Дьокуускай, Тулагы) Анна Барашкова т.,м.”Сыллар”, Евсей Евсеевич Андреев (57с., Амма, Алтан)Леонид Попов т., Трофим Семенов м.”Саныыбын төрөөбүт алааспын” ырыалары олус уйаннык, иһирэхтик толордулар. Киһи көрөн олорон, кырдьык даҕаны, ырыа диэн олох үтүөтүн, кэрэтин эрэ туойар, инникигэ эрэли, эрчими биэрэрин өссө төгүл итэҕэйэҕин. Хас биирдии финалистка бу биэрии кылаабынай спонсора, саха иһитин пропагандалыыр, үтүө-мааны   Көмүлүөк фирма оҥоһугун уонна бу бырайыакка кыттыбытын туоһулуур сертификат туттарылынна.

Дьэ, кэтэһиилээх кэрэ кэммит тиийэн кэлэн, дьүүллүүр сүбэ бэрэссэдээтэлэ Алексей Егоров биллэрэн, Вячеслав Макарьевич Поповка “Эн Сулускун 50+” бырайыак кыайыылааҕын үрдүк аата иҥэриллэр. Үөрүү-көтүү, өрөгөй тыына студия иһигэр эбиллэр. Көрөөччүлэр күргүөмүнэн “Эн-Сулускун!” диир хаһыылара өссө долгутар. Кыайыылаах Вячеслав Макарьевичка Саха НКИК анал кубогын ону кытта 100000 солк.сертификаты туттардылар. “Миигин бу бырайыакка балтым көҕүлээн кытыннарда. Бэйэм СӨ ОДьКХ судаарыстыбаннайунитарнай тэрилтэҕэ үлэлиибин.Бырайыак саҕаланыаҕыттан түөрт ырыаны ыллаатым, бииргэ улааппыт доҕотторум Василий Корякин, Виктор Платонов, Алексей Васильев ырыаларын дьоҥҥо-сэргэҕэ тиэрдээри кытынным. Кыттыбыппыттан астынным, финалга тахсаммын долгуйбутум уонна бу кыайыылаах буоламмын икки бүк долгуйдум” – диэн Вячеслав Макарьевич кэпсээтэ.

Читайте также:  Нюрбинский ысыах посетит творческая группа «АЙАР КУТ»

Ону таһынан, республика араас муннугуттан элбэх смс куолаһы хомуйан,“Көрөөччү биһирэбилэ” анал ааты Аркадий Самсонов ылла.Киниэхэ “Чэбдик” санаторийга сынньанарыгар путевка туттарылынна. “Мин сылгыһыппын. Бу бырайыак саҕаламмытыгар олохтоох кулуубум кыргыттара суруттарбыттар этэ. Кыра эрдэхпиттэн ыллыыр буолан, дойдубар кэнсиэртэргэ куруук кыттабын, ол иһин буолуо, кыттарга сайаапкалаабыттар. Этэргэ дылы, атым үрдүгэр олордум да, ырыанан айаннатабын. Сэргэх ырыалары сөбүлүүбүн. Онон олоҕу дьоллуур кыракый оккоолойдор тустарынан ыллаатым”- диэн санаатын Аркадий Гаврильевич үллэһиннэ.

Добун” ырыа студия салайааччыта Антон Иванов туруорбут бирииһин сертификатын Евсей Андреев ылла.

Дьэ, маннык биир дьикти, республика элбэх олохтоохторугар үлүскэн үөрүүнү биэрбит бырайыак түмүктэннэ.

Бу быһа биэриинэн ыытыллыбыт бырайыак норуоттан талааны арыйалларыгар көмөлөстөҕө. Дьиҥэ, биһиги быыспытыгар, ыраах нэһилиэктэргэ саһа сытар талааннар элбэхтэрэ чуолкай. Саха  эр дьонноро барахсаттар уһун кыһыммытыгар аар айылҕалыын алтыһыылара, тымныыттан чаҕыйбакка таһырдьа араас үлэни толоруулара,  өҥүрүк куйааска от охсон күнү быһа ходуһаҕа сылдьаллара, далбар Хотуттарбыт оҕолорун, сиэннэрин кытта бодьуустаһан, кинилэргэ тапталларын аныыллара барыта ырыа буолан кубулайан бу ыытыллыбыт киэһэ көһүннэҕэ. Ырыаттан норуот дууһата ыллыырын, сүрэҕэ үөрэрин бу бырайыак толору дакаастаата. Олоххо күүстээх санааланыы, олоххо тардыһыы да көһүннэ. 82 саастаах Владимир Иганы көрө, ырыаларын истэ олорон, ыччат дьоҥҥо холобур буоларыттан, киһи эрэ үөрэр.

Махтанабыт бу ыытыллыбыт бырайыак ырыа куттаах кыттааччыларыгар, бырайыагы бэлэмнээбит Саха НКИК кэлэктиибигэр. Маннык интэриэһинэй бырайыактар өссө да ыытылла турдуннар.

 Айар Кут медиа бөлөх