Биһиги ансаамбылбыт 2015 с. олунньуга «Сахалыы таҥас» общественнай тэрилтэ (салайааччы Светлана Борисовна Максимова) иһинэн саха таҥаһын баай историятын, культуратын ырыанан көрдөрөр, дьону-сэргэни сэҥээрдэр, көҕүлүүр сыаллаах-соруктаах тэриллибитэ. Ансаамбылбыт уус-уран салайааччытынан Саха Республикатын доруобуйатын харыстабылын туйгуна Маркова Екатерина Спиридоновна буолар. Музыкальнай салайааччыбыт бастаан биллиилээх мелодист Алексей Кириллович Калининскай-Луҥха Өлөксөй этэ.
Ансаамбылбытын бастаан «Көмүс сүүтүк» диэн ааттаабыппыт. Кэлин уопсай сүбэнэн ордук барсар уонна айар-тутар үлэбит ис хоһоонун ордук арыйар, тириэрдэр диэммит «Дьүрүскэн оһуор» диэн ааппытын уларыппыппыт.
Маҥнайгы сүрэхтэниибитинэн Улуу Кыайыы 70 сылыгар анаммыт «Далбар Хотун» диэн дьахталлар вокальнай ансаамбылларын конкурсугар кыттыыбыт буолбута. Бу конкурска дьону-сэргэни көрөн, сценаны кытта билсэн, этэҥҥэ кыттаммыт сүргэбит көтөҕүллэн, салҕыы ырыанан өссө күүскэ дьарыктанар, элбэхтэ тэрээһиннэргэ кыттар баҕа санаа үөскээбитэ. Ол кэннэ «Ырыа күнүн» тэрээһинигэр, Республика кунугэр, Туймаада ыһыахтарыгар, «Ньургуһун ыһыаҕар» ситиһиилээхтик кыттыбыппыт.
2016 с. талааннаах музыкант, ырыаһыт, баянист Алексей Потапов салайыытынан 40-ча буолан дьарыктаммыппыт. Бу дьыл биьиги «Сахалыы таҥас» общественнай тэрилтэ ансамбла буоларбытын ордук тоһоҕолоон чопчулуур, иистэнньэннэргэ аналлаах саамай иннибитигэр туттар «Уран оһуор» диэн ырыаламмыппыт. Ырыабытын поэт Рустам Хон тылыгар Алексей Потапов бэйэтэ суруйбута. Эмиэ бу дьыл «Киһини үлэ киэргэтэр» диэн дириҥ ис хоһоонноох ырыабытын сүрэхтээбиппит.
2017 сылтан бу күҥҥэ диэри үһүс сылын СР үтүөлээх учуутала, Россия үөрэҕириитин туйгуна, «Учууталлар учууталлара», педагогическай колледж музыкальнай отделениетын преподавателэ, Саха республикатын үтүөлээх учуутала, 48 сыл стажтаах элбэх хордары салайан үөрэппит Альбина Афанасьевна Пилецкая ырыаны толоруу, музыка алыбын кистэлэҥнэрин арыйан үөрэтэн, салайан кэллэ. Ансаамбылбытыгар дьарыктаммыппыт, ыллаабыппыт тухары син добуоччу дьоһун ситиһиилэрдэннибит. Ол курдук 2017с. «Поющая Туймаада» конкурска кыттыыны ылбыппыт. Эмиэ бу дьыл «Дьүрүскэн куолас» республикатааҕы ырыа күрэҕэр грамотанан бэлиэтэммиппит. 2018с. «Ыллыыр омук кэскиллээх» куорат ансаамбылларын көрүү конкурсугар 3 истиэпэннээх лауреат аатын ылары ситиспиппит. Эмиэ бу дьыл Анна Барашкова кэриэгэр аналлаах республиканскай конкурска, норуоттар икки ардыларынааҕы фестивальга «Ариранг» хордар парадтарыгар кыттыыны ылбыппыт.
Быйыл бүтүн Россиятааҕы хордары көрүү конкурсун региональнай этабыгар, «Северная радуга» Норуоттар икки ардыларынааҕы конкурска кыттан 1 степеннээх Лауреат буоллубут.
Элбээммит билигин хор диэн буоллубут. Быйылгыттан репетуарбытыгар үҥкүү нүөмэрдэрин киллэрдибит. Алексей Калининскай « Сахам кэрэ далбардара» диэн ырыатыгар үнкүүлээх композиция туруорбуппут. Репертуарбыт кэҥээн нуучча композитордарын, эвенкийскай ырыалары киллэрдибит. Былырыын «Саха Экспо» центрга тэрилтэбит тэрийбит выставкатыгар улахан концерт туруорбуппут.
Инникитин былааммыт киэҥ. Ол курдук, салҕыы «Поющая Туймаада», биллиилээх корейскай дирижер Но Тэ Чол ыытар «Ариранг» фестивалыгар кыттаары бэлэмнэнэ сылдьабыт. Уонна бу дьыл ыам ыйыгар Турция Анталья куоратыгар Норуоттар икки ардыларынааҕы Музыка уонна үҥкүү фестивалыгар конкурска ыҥырыы тутан бэлэмнэнэ, кынаппытын куурда сылдьабыт.
Биһиги хорбутугар араас идэлээх, араас саастаах кэрэ далбардар сылдьабыт. Бары улэлиибит, сорохтор хас да улэлээхтэр. Бириэмэбитин таба аттараммыт кэрэ эйгэтигэр ырыанан түмсэн бары биир дьиэ кэргэн курдук өйдөһөн-өйөнсөн сылдьабыт. «Сахалыы танас» тэрилтэ хора буоларбытынан элбэх талааннаах иистэнньэҥ, уус, айар талааннаах, норуот да маастардара бааллар испитигэр. Кыралаан көстүүмнэрбитин бэйэбит тигэргэ үөрэнэбит.
Ырыа-үҥкүү кынаттаах кэрэҕэ-үтүөҕэ тардыһан үүнэбит, сайдабыт, чугас дьоммутугар сырдыгынан сыдьаайабыт.
«Дьүрүскэн оһуор» ансаамбыл кыттыылаахтара
