БООТУРДАР ООНЬУУЛАРА

Марха улууһа тэриллибитэ 195 сыллаах үбүлүөйүгэр анаммыт быйылгы  Ньурба улуустааҕы ыһыаҕар бэс ыйын 24 күнүгэр “Боотурдар оонньуулара”  Ньурба  күүстээхтэрин, быһыйдарын күрэҕэ буолла. Эдэр ыччакка бастыҥтан бастыҥ Боотур аатын иһин күрэҕи улуустааҕы физкультуура уонна спорт комитета уонна аһыллыытын Түмүк нэһилиэгин “Алгыс” Норуот Айымньытын дьиэтэ тэрийэн ыыттылар. 

14 нэһилиэк бастыҥ спортсменнара Ньурба эдэр кэскиллээх ыччата кыттыыны ыллылар: Обоев Николай (Антоновка), Николаев Альберт (Үөдэй), Андреев Ньургун (Дьиикимдэ),  Моисеев Сахастан (Маар), Иванов Иван (Өҥөлдьө), Бакалаев Сергей (Ньурбачаан), Саввинов Иван (Малдьаҕар), Охлопков Николай (Дьаархан), Сергеев Рустам , Васильев Платон (Чаппанда), Николаев Иван (Малдьаҕар), Николаев Владимир (Таркаайы), Васильев Сахаян (Акана), Федоров Владимир (Маалыйкай), Кириллин Родион (Хорула).

Киин түһүлгэ трибуналара ыалдьааччыларынан толору буолан, миэстэтэ суох хаалбыттар түргэн-тарҕан дохсун күрэҕи  туран эрэн да көрдүлэр. Көрөөччү эр дьон өттө  боотурдар кыахтарын көрө-билэ, ырыт-анаара кэпсэттилэр, кыыс, далбар да өттө да хаалсыбакка, ытыстарын таһынан, үөрүүлэрин, хомойууларын саҥа аллайыынан биллэрэ олордулар.

Бастакы күрэххэ боотурдар 400 миэтирэ5э сүүрдүлэр.  Манна Октябрьскай нэһилиэк спортсмена Николай Обоев бастаата,  иккис Владимир Федоров (Маалыкай) кэллэ.

Хапсаҕайга киирсиигэ быраабыла быһыытынан ким хотторбут туораан иһэр буолла. Онон жеребьевкаҕа кыттыы суолтата улаатан таҕыста. Хапсаҕай саха норуотун биир саамай кэрэ көстүүлээх күрэҕэ буоларын, түһүлгэҕэ түмсэн олорооччулар, дьэ, уу-харахтарынан бигэтик көрдүлэр. Уолаттар хас биирдии киирсиилэрэ бэйэтэ кыра испэктээк, дьикти  ооньуу курдук буолуталаатылар. Манна Маалыкай нэһилиэгин аатыттан күрэхтэһэр улахан уҥуохтаах, быыппастар быччыҥнаах Ньурба дьиҥнээх боотура  Владимир Федоров  бастаата. Альберт Николаев иккис буолла, үһүс миэстэҕэ Сахаян Васильев таҕыста.

Үһүс тыҥааһыннаах күүс-уох, эт-хаан сайдыытын дьиҥ чахчы туоһулуур күрэх таас көтөҕөөһүнэ буолла. Бу күрэххэ бэйэтэ да тас быһыытынан-таһаатынан, бэлэмнэммитинэн биллэ баһыйан туран, биир эргиири тааһы көтөҕөн толору хааман кэлэн, бастакы миэстэни ылла Владимир Федоров. Иккис миэстэҕэ Малдьаҕартан Уйбаан Саввинов таҕыста.

Эҕэрдэлээһин иннинэ Боотурдар ооньууларын 2 төгүллээх (былырыыҥҥы уонна быйылгы) кыайыылааҕа Владимир Федорову  кытта кэпсэтэн ыллыбыт, бастаан эҕэрдэлээн баран бэйэтин билисиһиннэрэригэр көрдөстүбүт:

Владимир Федоров: —  Бэйэм 1992 сыллаахха күн сирин көбүтүм, төрүт Маалыкайбын, билигин куоракка олоробун, МЧС сулууспатыгар үлэлиибин. Биһиги дьиэ кэргэммит ийэм да, аҕам да өттүнэн бары спордунан дьарыктаммыт дьон буолаллар. Аҕам Федот Васильевич Федоров көҥүл тустууга спорт маастарыгар кандидат,  бииргэ төрөөбүт убайа көҥүл тустууга  маастар, Иван Васильевич Союзка спорт маастара боксаҕа, уопсайынан,  аҕам  убайдара , бырааттара бары спортка сыһыаннаахтар. Онон мин кинилэр туйахатарын хатарар буоллаҕым.

— Владимир, бу күрэххэ кыттарга эт-хаан өттүнэн бэлэм буолартан  ураты өссө туох нааданый?

Владимир Федоров: — Буор кутуҥ бэлэмиттэн ураты, күрэхтэргэ психологически бэлэм буолуохха наада. Уонна сылы быһа дьарыктаммыт, бэлэмнэммит киһи син-биир кыайар туруктанар дии саныыбын. Билигин бары бу маннык күрэхтэргэ идэтийэн туран дьарыктаналлар.Боотурдар ооньууларыгар кыттыбыт уолаттар быйыл бары үчүгэй бэлэмнээхтэрэ  көстөр.

Владимир а5атын Федот Васильевич Федоровы  кытта эмиэ  кэпсэттибит. Уолун киирсиитин а5ата куруук көрөр эбит, Володяны хайдах спортка сыһыарбытын туһунан ыйыталастыбыт.

Ф.В.: — Оскуолаҕа сылдьан Володя спорт эйгэтигэр олус эрчиллибэтэҕэ, ол гынан баран дьиэбитигэр турник, спорт муннуга  оҥорон биэрбиппитигэр,  бэйэтэ сарысарда аайы дьарыктанар этэ.  Бэйэтин кыа5ынан, билэринэн диэххэ. Телевизорга НВК “Саха”каналга Белолюбскайдааҕы көрө-көрө ымсыырар этэ, иккис кылааска үөрэнэ сылдьан бэйэтин чемпион гына уруһуйдаабыта.  Ол уруһуйа билигин да баар. Уолбут Володя бэйэтин суолун бэйэтэ солоно сылдьар, спортка да буоллун, үлэтигэр да буоллун,  бэйэтин кыаҕын, сайдыытын көрдөрөн санаабыт санаатын бу олоххо ситиһэр диэн көрөбүн. 

Ньурба улууһун Уолан Боотуругар Владимир Федоровка АЙАР КУТ түмсүү аатыттан инники күрэхтэригэр өссө элбэх  кыайыылары, үрдүк  ситиһиилэри, иллээх-эйэлээх  дьиэ кэргэнигэр  сахалыы сиэрдээх толору  дьоллоох олоҕу баҕарабыт!

Елена Толстоухова