Маннык ааттаах олус иэйиилээх кэрэ киэһэ Өксөкүлээх аатынан Култуура дьиэтин галереятыгар, Дьааҥыттан төрүттээх, ырыа абылаҥар ылларбыт, хомоҕой хоһооннору айар, “Голос” ырыа студиятын салайааччыта Христофор Саввиновка ананна.

Ырыа киэһэтин Эрчим салайан ыытта. Бу күн көрөөччүлэригэр эдэркээн Христофор үөрүү икки өрөгөйүн бэлэхтээтэ. Бастатан туран, айбыт хоһоонноро хомуурунньукка хомуллан өлбөт-сүппэт үйэлэннилэр. Иккиһинэн, суруйбут хоһоонноро истиҥ ырыаларга кубулуйан көрөөччүлэр куттарын туттулар. “Алгыстаах аартыгым” хоһоон хомуурунньугун, Егор Иванов салайааччылаах “АЙАР КУТ” медиа бөлөх таһаарда, профессиональнай хаартыскаҕа түһэриитин оҥордо.

Толору саал ытыс тыаһынан ааптар Христофор Саввинов  “Алгыстаах аартыгым” ырыатынан айар биэчэрин саҕалаата. Ааптар ырыаларын саха эстрадатын сулустара Дарья Лаврова “Кыыс таптала”, “Дууһам иччитэ”, Ирена Файрушина “Ыллаа, гитарам”, Эрчим “Оҕо саас”, “Ытаама”, ырыаһыттар- Василий Новоприезжий “Сүктэр кыыска алгыс”, “Мин кэллим”, Кирилл Матвеев “Ахтылҕаным”, Люция “Кыыс куо”, Гран Тулуйхан “Үөр кыталык”  ырыалары олус иэйиилээхтик толордулар.  Айыылана Степанова толоруутугар “Саатар биирдэ” ырыаны иһиттибит. Бу ырыаҕа аны сайын клип тахсыахтаах.

Христофор Саввинов-“Голос” оҕо ырыа студиятын салайааччыта. Онон,үөрүүлээх, ырыатын аартыга арыллар күнүгэр салайар студиятын оҕолоро, кинилэр төрөппүттэрэ кыттыыны ыллылар. Биллэн турар, дьоро киэһээ саамай үрдүк чыпчаалынан — уһуйааччыларын толоруутугар “Саҥа ырыа” ырыаны толоруулара буолла. 45 тэбис-тэҥ үрүҥ көстүүмнээх оҕолор олус үчүгэйдик туттан-хаптан баар дьону үөртүлэр. Киһи истэн олорон, кырдьык да олох үтүөтэ, кэскилэ, кэрэтэ ырыаҕа баарын итэҕэйэр. Уонна оҕолор толорууларынан эдэр уһуйааччы профессионал таһымнааҕын сөҕөҕүн. Доҕордуу сыһыан, коллектив тыына баарыттан үөрэҕин эрэ.

Ытыс күүстээх тыаһынан саҥа клиби сүрэхтээһин буолла. Гран Тулуйхан толоруутугар “Ыллыым –Айыым” ырыатыгар сабыс саҥа клип көрөн астынныбыт.

Читайте также:  История одной ФОТОГРАФИИ

Клиби устары Саввиновтар иккиэн толкуйдаабыттар. Режиссер Анна Егороваҕа идеяларын кэпсээбиттэригэр, кини бэйэтин көрүүлэрин этэн,сүбэлэһэн оҥорбуттар. Ырыаҕа хамсаныылары хореограф Светлана Протопопова, оператордарынан Саргылан Винокуров, Майк Михайлюк үлэлээбиттэр.Клибка кыттааччылар Трэвелерс кофейняҕа, Саха гимназияҕа, “Пространство” фотостудияҕа сылдьан уһуллубуттар.Клибка ылланар ырыалар мелодияларын уонна аранжировкатын Христофор Саввинов оҥорбут. Партиянан куолас туруоруута, толоруу манерата, устуу үлэтин ымпыга-чымпыга  –бу барыта студия сүрүн салайааччыта Татьяна Егоровна сатабыла буолар.

Ырыаһыт аналын илдьэ сылдьар, эстрада чаҕылхай ырыаһыта Дарья Лаврова ыллаабыт ырыаларын туһунан ыйыппыппар, маннык эппиэттээтэ:” Мин Христофор Саввиновы кытта аан бастаан Айаал Сильверсан ыыппыт биир үтүө киэһэтигэр билсибиппит. Мин “Эйиэхэ” диэн ырыаны ыллыырбар Христофор фортепиананан оонньообута. Ырыам олус табыллан, үөрбүтүм аҕай. Уонна бу эдэр талааннаах музыканныын инникитин да бииргэ үлэлэһэргэ бигэ санаа ылыммытым. Сотору кэминэн кэргэнинээн Татьяна Егоровналыын “Голос” студия арыммыттарыгар, кыыспын Викторияны киллэрбитим. Онон, кыыһым үөрэ-көтө сылдьар. Онтон арай, айар командировкам саҕана, “биһиги дьиэ-кэргэн эйиэхэ кэһиилээхпит, икки ырыаны ыллыыргар биэрэбит” диэн үөрдүбүттэрэ. Дьэ, олору бүгүн сүрэхтээтим. Долгуйдум аҕай. Аны мантан ыла репертуарбар киллэриэм”-диэн үөрүүтүн үллэһиннэ.”

Салгыы Мэҥэ-Хаҥалас Наахаратааҕы филиалын салайааччытын Николай Иванович Никаноровы көрүстүм. «Мэҥэ-Хаҥаластар ырыаһыт дьоммут. Киһи үөрэрэ диэн, кыра оҕолор ырыаҕа тардыһаллар. Ол кистэлэҥэ диэн, ырыаҕа уһуйааччылар баалларыттан. Ол курдук, бары билэргит курдук, саха муусукатын киэҥ эйгэҕэ таһаарбыт Светлана, Егор Неустроевтар сылын аайы лааҕыр үлэлэппиттэрэ. Ыллыыр оҕо элбэҕэ бэрт буолара, билигин сыл аайы сүүрбэ биэстии оҕону ылан үлэлиибит. Биһиэхэ, Наахараҕа филиал аспыттара биэс сыл буолла. Эрдэтээҥҥи  “Тулуйхан” ( Неустроевтар) ырыа студиятын билигин Татьяна, Христофор Саввиновтар үлэлэтэллэр. Студия аата “Голос” диэн буолбута. Бүгүҥҥү дьоро күнтэн олус астынным. Эдэр киһи айбыт ырыалара диэтэххэ олоҕу анаарыыта олус күүстээх. Онон, истээччи дууһатын таарыйар. Мелодиялара да олус табыллыбыттар. »

Тыйыс айылҕалаах Сахабыт сирин өлгөм бултаах хоту сиригэр үөскээбит-төрөөбүт, айылҕа маанылаах оҕото дэппит ааптарбыт бэйэтин туһунан маннык кэпсээтэ: “Мин кэпсээҥҥэ киирбит Дьааҥы хайаларын быыһыгар олохсуйбут Дьааҥы улууһугар төрөөбүтүм. Хоһоон, ырыа эйгэтигэр адьас кыра сылдьан киирбитим. Ийэм өртүнэн эбэм Мария Дмитриевна Ефимова айар, суруйар дьоҕурдаах этэ. Былыргы үһүйээннэри, кэпсээннэри, остуоруйалары кэпсиирэ. Норуот ырыаларын ыллыыра. Улахан сүһүөх ыарыылаах буолан, кыайан суруйар кыаҕа суоҕуттан,  миэхэ суруйтарара. Ол иһин, тыл эйгэтигэр эбэбиттэн сыстыбыппын. Киниттэн тахсар былыргы тыллары суолталарын билэргэ, сөпкө туттарга эбэм барахсан үөрэттэҕэ диэн махтана саныыбын. Бастакы ырыабын 2009 сыллаахха суруйбутум. Ырыаларбын гитараҕа үксүгэр түүн, дьонум утуйбуттарын кэннэ ыллыыр да кэмнэр бааллара. Кэлин ырыам элбээбитигэр, кэргэним айар биэчэрдэ оҥоруохха диэн этии киллэрэн, бу дьоро киэһэ буолла. Онон, күндү киһибэр, кэргэммэр улаханнык махтанабын. Дьылҕабар махтанабын, айар талааным аһылларыгар, хоһооннорум ырыа буолан көтүүлэригэр ырыа куттаах Светлана Александровна, Егор Ильич Неустроевтар дьиэ-кэргэнигэр түбэһиннэрбитин иһин. Киһиэхэ кыра да наада ээ, хомоҕой хоһоон хонуутугар кыракый муоста ууруллан ылбаҕай ырыа түһүлгэтигэр кубулуйдаҕа. Онно төһүү күүһүнэн кэргэним барахсан буолар.Бииргэ үлэлээммит ситиһиибит да элбэх. Уонна үйэбэр бастакы хоһооннорум хомуурунньуга күн сирин көрөн  үөрэ сылдьабын. АйарКут медиа бөлөххө махтанабын. Кинилэргэ ситиһиини баҕарабын» – диэн кэпсээтэ.

Читайте также:  «Эрэллээх Ньурбакаан удьуора, уруйдан уостубат уоххунан!»

Христофор дьоро киэһэтигэр “Таптыыбын”, “Кыыс”, “Эйиигинэ суох”, “Кырдьыгы уот хараххар” ырыаларын гитаранан ыллаата. Хаанынан сүүрэр өбүгэлэриттэн бэриллибит талааннарынан үс бииргэ төрөөбүттэр- Христофор, Валера, Павел Саввиновтар “Туйаарыма” ырыаларын дьон уруйдуу көрүстэ.

Дьэ, ити курдук, хоһоонньут, мелодист, ыччаты ырыа абылаҥар уһуйааччы Христофор Саввинов ырыатын дьоро түһүлгэтэ бар дьоҥҥо биһирэннэ. Кини дьоло- эдэригэр. Онон, инникитин ырыаһыт, мелодист Христофор Саввинов аата саха ырыатын түһүлгэтигэр ааттаныаҕа диэн эрэнэбит.

                                «АЙАР КУТ» медиа бөлөх